Nysana kózdeýden Parıj Olımpıadasynyń qola júldegeri Islam Sátpaev Nıý-Delı (Úndistan) qalasynda ótip jatqan Azııa chempıonatynda bas júlde oljalady.
50 metrlik qashyqtyqtan jatyp atý saıysynda mergen múlt ketpedi. Kúmis medaldy taǵy bir jerlesimiz Nıkıta Shahtorın ıelendi. Islam men Nıkıta Konstantın Malınovskıımen birge komandalyq jarysta da aldaryna jan salmady. Joǵary jyldamdyqty tapansha atýda (25 metr) quramynda Nıkıta Chırıýkın, Artemıı Kabakov, Kırıll Sýrkanov syndy serkeleri bar elimizdiń quramasy teńdessiz dep tanyldy. Jekelegen saıysta N.Chırıýkın kúmispen kúpteldi.
Qazaqtyń belgili erkin kúres sheberi Rızabek Aıtmuhan 13 aqpanda Bishkekte ótetin Super 4 Wrestling týrnırinde kúsh synasady. Qandasymyzǵa 97 kg salmaq dárejesiniń bas júldesin oljalaý úshin Álıhan Ksoev (Reseı), Ahmed Bataev (Bolgarııa), Merab Sýleımanıshvılı (Grýzııa) syndy beldi balýandardan basym túsý qajet. 25 aqpan – 1 naýryz aralyǵynda Albanııa astanasy – Tıranada uıymdastyrylatyn Muhamet Malo memorıalynda elimizdiń grek-rım kúresi sheberleri qandaı quramda óner kórsetetini belgili boldy. Jarysta Marlan Muqashev, Arsen Juma (55 kg), Ishar Qurbaev, Erbol Qamalıev, Aqjol Tuıaqov (60 kg), Erkebulan Ardaqov, Ernur Fıdahmetov, Baqytjan Kabdyl (63 kg), Meıirjan Shermahanbet, Erjet Jarylqasyn (67 kg), Nıkolaı Hapko, Danııar Qalenov, Almatbek Amanbek (72 kg), Kaharman Qısmetov, Mereı Máýletqanov (77 kg), Demeý Jadyraev, Dıas Qalen, Álmır Tólebaev (82 kg), Islam Evloev, Shámil Ojaev, Baýyrjan Mýsın (87 kg), Iýsýf Masıev, Nurasyl Amanáli, Raıymbek Tursyn (97 kg), Álimhan Syzdyqov, Johar Uzarov, Oljas Syrlybaıǵa (130 kg) senim artylyp otyr. Arab túbeginde aıaqtalǵan «Oman týry» kópkúndiginde «XDS Astana Team» klýbynyń veloshabandozdary Krıstıan Skaronı men Krıstıan Rodrıges alǵashqy eki oryndy oljalady. Jeńimpazdyń ýaqyty – 19:33:16. Rodrıges Skaronıden 24 sekýnd qalyp qoıdy. Osy tabysynyń arqasynda elordalyq komanda (2488 upaı) álemdik reıtıngte kósh bastady. Ekinshi, úshinshi oryndarǵa BAÁ-niń «UAE Team Emirates – XRG» (2457 upaı) pen Aýstralııanyń «Team Jayco AlUla» (2100) klýbtary jaıǵasty. Áıelder kúresinen elimizdiń ulttyq quramasynyń bas bapkeri bolyp Nursultan Temirov taǵaıyndaldy. 2014 jyldan beri jattyqtyrýshylyq qyzmet atqaratyn bilikti maman bir top tanymal balýandy tárbıeledi. Olardyń qatarynda álem chempıonatynda úsh kúmis, bir qola medal ıelenip, tórt dúrkin Azııa chempıony atanǵan Jámılá Baqbergenova da bar.