Ekologııalyq senbilikter jalǵastyryla bermek.Bul kúnde óndiristi óńirdiń qalalary men aýdandary ortalyqtarynda, alystaǵy eldi mekender, kólder men ózender jaǵalaýlary, orman-toǵaı aınalasy kóz tartarlyq beınege enip, jaınap-qulpyrǵan kórinister kóńil kórkeıtýde. Bul joly “Birligimiz jarasqan!” aksııasy aıasynda barlyq jerde ótip jatqan “Aýyldyń gúldenýi – Qazaqstannyń gúldenýi” atty sharaǵa úlken qoldaý kórsetýshi úkimettik emes jáne jastar uıymdary qorshaǵan ortany tazartý, kórkeıtý jumystaryn jumyla atqarýda.
Aldymen temirtaýlyqtar bastaǵan osynaý ıgilikti is Samarqan sý qoımasynyń kópshilik demalatyn oryndaryn abattandyrýǵa arnaldy. Atalǵan uıymdar belsendileri qataryna kelip qosylǵan qala turǵyndary eki kún boıynda jasandy kól tóńiregin jurtshylyq súısine tynyǵatyn orynǵa aınaldyrdy.
Shapaǵaty mol sharany ilip áketken balqashtyqtar bolsa shahar irgesindegi aıdyn jaǵalaýlaryn tazartýdy qolǵa aldy. Buǵan uıytqy bolǵan “Jas Otan” jastar qanaty, “Balqash jastar klýby”, Stýdenter alıansy, “Murager” sııaqty uıymdar músheleri oǵan qatysýshylardyń bel ortasynda júrdi.
Jańaarqa aýdanynyń ortalyǵy – Atasý kentindegi O. Baýbekov atyndaǵy saıabaq ta osy sharanyń arqasynda ajary kire tústi. “Birligi bekem eldiń berekesi mol bolmaq” degen urandy alysqa jańǵyrtyp, bas qosqan jergilikti jigitter men qyzdar eńbeginen keıin saıabaq ishi jaınap sala berdi. О́zderi oınap júrgen qural-qondyrǵylardyń syrlanyp, jóndelýine, ásirese, baldyrǵandar qýanyshty boldy. Prıozersk kentiniń saıabaǵy da sándendi. Munda úlkendermen birge ortaq iske atsalysqan balalarǵa balmuzdaqtar syıǵa taratyldy.
Ekologııalyq senbilikter jalǵastyryla bermek. Ol búginde qalypty úrdiske aınalyp keledi. Botaqara aýylynyń jastary Nura ózeni boıyn kúl-qoqystan tazartýǵa shyqsa, qarqaralylyq qurby-zamandastary orman ishin tazalaýdy uıǵardy.
– Qazirgi jaınaǵan ómir talap-talǵamyna tamasha jarasty mundaı sharalarǵa bastamashy bolyp, jarqyratyp kótergen jastarǵa razylyǵymyz bólek. Túpki maqsaty maǵynaly, tárbıelik máni zor isti bárimiz qostaımyz,–dep temirtaýlyq azamat Janas Arysov aıtqandaı, aınalany jasandyrý oblysta bul kúnde mereıli mindetke aınalyp tur.
Qaraǵandy oblysy.