Ulytaý oblysynyń tarıhı-arheologııalyq mýzeıinde uıymdastyrylǵan «Saǵattar syry» kórmesi kórermenge jol tartty, dep habarlaıdy Egemen.kz.
Kórme mýzeı qorynda saqtalǵan saǵattardan quralǵan. Ár jyldary mýzeı qoryna qala turǵyndary qalta, qol, qabyrǵa jáne alqa saǵattaryn syıǵa tartyp kelgen.
Kórmege mýzeıdiń kolleksııalyq qorynda saqtalǵan 1940–1950 jyldardan bastaý alatyn 74 saǵat túri qoıyldy. Olardyń qatarynda elimizge, Ulytaý óńirine tanymal tulǵalarǵa tıesili qol saǵattar da bar.
Kórmege mýzeıdegi eń kóne jádiger – «Pavel Býre» mehanıkalyq qabyrǵa saǵaty usynyldy. «Pavel Býre» – XIX–XX ǵasyrlar basynda Shveısarııa men Reseıde jumys istegen, joǵary sapa standarttarymen tanylǵan saǵat jasaýshylar brendi. Joǵary mártebege ıe bolǵan bul kompanııanyń mehanıkalyq saǵaty Qarsaqpaıdaǵy aǵylshyndar úıinde qoldanysta bolǵan.
Kórmege kelgen adamdar túrli saǵattardyń tarıhymen tanysa alady.