Búgin Taldyqorǵanda «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasynyń ókilderi Ortalyq Azııadaǵy akkýmýlıator batareıalaryn shyǵaratyn eń iri kásiporyn – «Qaınar AKB» JShS eńbek ujymymen kezdesti, dep habarlaıdy Egemen.kz.
Kezdesý Jańa Konstıtýsııa jobasyn jáne aldaǵy referendýmdy túsindirýge arnaldy. Qatysýshylar Ata zańnyń ornyqty ári ádiletti memleket qurýdaǵy mańyzyn talqylady. Mundaı memlekette túsinikti erejeler jumys istep, azamattardyń quqyqtary qorǵalyp, qoǵam men bılik arasyndaǵy senim nyǵaıady.
Kezdesýge qatysýshylar óndiris alańdaryndaǵy dıalogtiń mańyzyn erekshe atap ótti. Sebebi turaqtylyqqa, boljamdylyqqa jáne ádilettilikke degen suranys dál osyndaı ortada aıqyn seziledi. Talqylaýǵa Premer-mınıstrdiń orynbasary – Mádenıet jáne aqparat mınıstri, koalısııa tóraǵasynyń orynbasary Aıda Balaeva, Májilis depýtattary Rýslan Qojasbaev pen Nıkıta Shatalov, Jetisý oblystyq Qoǵamdyq keńesiniń tóraǵasy Aset Qydyrmanov, sondaı-aq kásiporyn basshylyǵy qatysty.
Aıda Balaeva óz sózinde joba normalaryn durys túsindirýdiń mańyzdylyǵyna arnaıy toqtaldy.
«90-jyldary da, qazir de zaýyt óńirdegi óz salasynyń kóshbasshysy boldy. Men «Qaınar» zaýytynyń qaladaǵy turaqty jumys istegen sanaýly kásiporyndardyń biri bolǵanyna kýámin. Naryq jaǵdaıy ózgerdi, soǵan sáıkes kásiporyn da jańǵyrtylyp, óńirlik kóshbasshylyq ornyn saqtaý úshin damyp keledi.
Álem de, el de ózgerip jatyr. Jańa jaǵdaıda damý jáne joǵary qarqyndy saqtaý úshin biz uzaq jyldarǵa arnalǵan qundylyqtar men baǵdarlardy aıqyndaýymyz qajet. Bizdiń tańdaýymyzdyń negizi – Jańa Konstıtýsııa.
Onyń mátininiń negizinde formaldy zań termınderi emes, eń aldymen – Adam, onyń quqyqtary men qajettilikteri tur. Konstıtýsııanyń osyndaı adamǵa baǵdarlanýy azamattar men memlekettik organdardyń quqyqtary men mindetteri arasyndaǵy naqty tepe-teńdikti jáne olardyń arasyndaǵy jańa qatynastar júıesin belgileıtin quqyqtyq qujatqa aınaldyrady», dedi Aıda Balaeva.
Onyń aıtýynsha, eldiń jańa Ata zańy ár azamattyń eńbek etýge, qaýipsiz jaǵdaıda jumys isteýge jáne ádil eńbekaqy alýǵa quqyǵyn eń joǵary deńgeıde bekitedi, kemsitýdiń kez kelgen túrin joqqa shyǵarady. Konstıtýsııalyq normalardyń birqatary óndiristik jaraqattanýdy, kásibı aýrýlardy azaıtýǵa jáne eńbekke qabilettilikti saqtaýǵa tikeleı baǵyttalǵan.
Kásiporyn atynan «Qaınar AKB» JShS dırektory Erbol Ájmaǵambetov joba tóńiregindegi qoǵamdyq talqylaý men ózara qurmetke negizdelgen dıalogtiń mańyzyn atap ótti.
«Búginde memlekettik aýqymdaǵy árbir sheshim qoǵammen ashyq dıalog arqyly qabyldanýy asa mańyzdy. Sizderdiń qatysýlaryńyz ben koalısııa músheleriniń jumysynyń arqasynda talqylaý úderisi ashyq, mazmundy ótýde. Kezdesýler, baıandamalar, BAQ pen áleýmettik jelilerdegi jarııalanymdar arqyly atqarylǵan jumystyń aýqymyn kórip otyrmyz. Bul senimdi nyǵaıtady», dedi ol.
Parlament Májilisiniń depýtaty Rýslan Qojasbaev jańa Konstıtýsııanyń negizgi qaǵıdattaryna toqtalyp, qujat quqyqtyq júıeni jańartýǵa jáne ádilettilikti nyǵaıtýǵa baǵyttalǵanyn atap ótti. Ol azamattardyń quqyqtaryn qorǵaýdy, qaýipsizdik pen áleýmettik kepildikterdi qamtamasyz etýge basymdyq beriletinin aıtty.
Sondaı-aq Jetisý oblystyq Qoǵamdyq keńesiniń tóraǵasy Áset Qydyrmanov óz pikirin bildirdi.
«Konstıtýsııadaǵy jeke menshiktiń qol suǵylmaýshylyǵy men zań aldynda teńdik týraly normalar jańa jumys oryndarynyń, tehnologııalar men múmkindikterdiń paıda bolýyna kepil bolady. Ekonomıkalyq turaqtylyq – jalaqynyń ýaqytyly tólenýi, zamanaýı jabdyqtar jáne adamdardyń erteńgi kúnge senimi», dedi ol.
Aıda Balaeva jumys berýshi men memlekettik organdardyń laıyqty eńbek jaǵdaıyn jasaý jáne ádil eńbekaqy tóleý jónindegi jaýapkershiligi eldegi eń joǵary zańnamalyq akt deńgeıine kóterilgenin de atap ótti. Bul azamattarǵa olardyń quqyqtary buzylmaıtynyna kepildik beredi. Sondaı-aq eńbek nátıjesi kásibı ólshemderge sáıkes, jumys berýshi men jumyskerdiń ózara kelisimi negizinde baǵalanatynyn qamtamasyz etedi.
Kezdesý sońynda qatysýshylar jobany ashyq talqylaýdyń mańyzyn atap ótip, referendým azamattardyń keń qatysýymen ótýi úshin túsindirý jumystaryn jalǵastyrý qajettigin aıtty.