Jezqazǵan qalasyndaǵy Serke Qojamqulov atyndaǵy drama teatrynda qarymdy qalamger, Jazýshylar odaǵynyń múshesi, Qazaqstannyń qurmetti jýrnalısi Batyrbek Myrzabekovtiń on tomdyq shyǵarmalar jınaǵynyń tusaýkeseri ótti, dep habarlaıdy Egemen.kz.
Taǵylymdy sharany Jezqazǵan qalasynyń mádenıet jáne tilderdi damytý bólimi uıymdastyrdy. Ontomdyq shyǵarmalar jınaǵy Jezqazǵan qalasynyń ákimi Qaırat Shaıjanovtyń bastamasymen, demeýshilik qoldaý arqyly Almaty qalasyndaǵy «Ǵarysh» baspasynan jaryq kórdi.
Kesh belgili jazýshynyń «Amanat» romanynan alynǵan «Tórteý túgel bolǵanda…» atty ınssenırovkamen ashyldy. Kórermen shyǵarmashylyǵyn arqaý etken beınebaıannan kesh ıesiniń jemisti de jeńisti joldarymen tanysty.
Ulytaý oblysynda tuńǵysh ret jaryq kórgen kóptomdyq eńbektiń tusaýyn Qazaqstan Jazýshylar odaǵynyń basqarma tóraǵasy Mereke Qulkenov kesti.
«Qurmet» ordeniniń ıegeri Batyrbek Myrzabekovtiń osyǵan deıin «Tasbulaq», «Ulytaýdyń ulymyn», «Jeti qyz», «Alty beldiń asýy» atty jyr jınaqtary, «Amanat», «Ulytaý - ulttyń uıasy», «Dúzen», «Qos batyr», «Shýaq shashqan shańyraq» sııaqty tarıhı pýblısıstıkalyq kitaptary jaryq kórgen. Bertinde qazaqtan shyqqan tuńǵysh geolog Qanysh Sátbaevtyń týǵanyna 125 jyl tolýyna oraı «Máńgilik ǵumyr» atty roman – esse tartý etken.
Jezqazǵan qalasynyń ákimi, óner jáne mádenıet ıeleri, til janashyrlary kesh ıesiniń shyǵarmashylyǵy jaıynda jyly lebizin jetkizdi. Belgili qalamgerler, Qazaqstan Jazýshylar odaǵynyń músheleri Ǵazız Eshtanaev, Musa Tileýov ádebıette alatyn ornyna toqtaldy.
Oblystyń tańdaýly ánshileri ánnen shashý shashyp, kesh kórigin qyzdyrdy.
Saltanatty kesh aıasynda Qazaqstan Jazýshylar odaǵynyń basqarma tóraǵasy Mereke Qulkenov «Ular» ádebı klýbynyń músheleri Muqaǵalı Seıtqazy men Janat Ábdiǵojındi Jazýshylar odaǵy músheligine qabyldap, kýálik tabystady.
Qarymdy qalamgerdiń on tomdyq shyǵarmalar jınaǵy oblystyq, qalalyq kitaphanalarǵa, sondaı-aq ýnıversıtetter men bilim berý uıymdarynyń kitap qoryna taratylady.