Jambyl oblysy Shý aýdany aýmaǵynda ornalasqan kóne Aqtóbe (Balasaǵun) qalashyǵy – túrki órkenıetiniń jarqyn izderin saqtaǵan tarıhı meken. Bul jerden tabylǵan arheologııalyq jádigerler ortaǵasyrlyq qala mádenıetiniń, qolóner men saýdanyń joǵary deńgeıde damyǵanyn aıǵaqtaıdy.
Qalashyq aýmaǵynan anyqtalǵan Qarahan memleketi kezeńine jatatyn qysh qumyralar sol dáýirdiń turmys-tirshiligi men sheberlik dástúrin aıqyn kórsetedi. Arheolog, tarıh ǵylymdarynyń doktory Ý.H.Shálekenov júrgizgen qazba jumystary kezinde tabylǵan bul buıymdar tabıǵı saz balshyqtan jasalyp, arnaıy peshterde kúıdirilgen.
Qysh qumyralardyń pishininiń shymyrlyǵy men qabyrǵasynyń beriktigi kóne sheberlerdiń isine degen jaýapkershiligi men kásibı deńgeıin ańǵartady. Geometrııalyq jáne ósimdik tektes órnekter buıymdarǵa kórkemdik sıpat berip, olardy qarapaıym turmystyq ydystan naǵyz qolóner týyndysyna aınaldyrǵan. Mamandardyń aıtýynsha, mundaı qysh buıymdardyń kóptep tabylýy Balasaǵun qalasy turǵyndarynyń otyryqshy ómir saltyn ustanyp, óndiris pen saýdany damytqanyn dáleldeıdi. Bul jádigerler sol kezeńdegi ekonomıkalyq qýat pen mádenı órleýdiń naqty kórinisi sanalady.Búginde mýzeı qorynda saqtaýly turǵan bul qundy muralar – ótken tarıhtyń shejiresi bolyp otyr.
Álına TURSYN,
Shý aýdandyq tarıhı-ólketaný mýzeı qyzmetkeri
Jambyl oblysy