Oral qalasynyń ákimshilik quqyq buzýshylyq ister jónindegi mamandandyrylǵan soty aqparattyq agenttikke qatysty isti qarap, saılaý zańnamasyn saqtamaı qoǵamdyq pikirge saýalnama júrgizgeni úshin jaýapkershilik júktedi. Sot sheshimimen jaýapty seriktestikke aıyppul salyndy, dep habarlaıdy Egemen.kz.
Is materıaldaryna sáıkes, 2026 jylǵy 11 aqpanda «Ýralskaıa nedelıa» basylymynyń Telegram-arnasynda 15 naýryzǵa josparlanǵan Qazaqstan Respýblıkasynyń jańa Konstıtýsııasy jobasy boıynsha referendýmǵa qatysty qoǵamdyq pikir saýalnamasy jarııalanǵan. Atalǵan basylymnyń quryltaıshysy – «Jýrnalıstskaıa ınısıatıva» jaýapkershiligi shekteýli seriktestigi.
Qoldanystaǵy «Qazaqstan Respýblıkasyndaǵy saılaý týraly» Konstıtýsııalyq zańnyń 28-baby 9-tarmaǵyna sáıkes, saılaýǵa nemese referendýmǵa baılanysty qoǵamdyq pikirge saýalnama júrgizýge keminde bes jyl jumys ótili bar zańdy tulǵalar ǵana quqyly. Bul úshin olar Ortalyq saılaý komıssııasyn aldyn ala jazbasha túrde habardar etip, tıisti qujattardyń kóshirmelerin usynýǵa mindetti.
Referendýmǵa 24 kún qaldy: Astanada keri sanaq tablolary ornatyldy
Zań talaptaryn buzý ákimshilik jaýapkershilikke ákep soǵady. Mundaı normalar referendýmdy ázirleý men ótkizý barysynda ashyqtyqty, senimdilikti jáne barlyq tarapqa teń jaǵdaıdy qamtamasyz etýge, sondaı-aq azamattardyń saılaý quqyqtaryn qorǵaýǵa baǵyttalǵan.
Gıdrotehnıkter jańa Konstıtýsııa boıynsha referendým ótkizýdi qoldady
Sot jarııalanǵan saýalnama zań talaptaryna sáıkes kelmeıdi dep tanydy. Seriktestiktiń kinási ákimshilik is qozǵaý týraly qaýlymen jáne jarııalanǵan materıaldyń skrınshottarymen rastalǵan.
Ákimshilik quqyq buzýshylyq týraly kodekstiń 120-babynyń 3-bóligine sáıkes, zańdy tulǵalarǵa 30 aılyq eseptik kórsetkish mólsherinde aıyppul qarastyrylǵan. Sot qaýlysymen «Jýrnalıstskaıa ınısıatıva» JShS kináli dep tanylyp, 129 750 teńge kóleminde aıyppul salyndy.
Sheshim ázirge zańdy kúshine engen joq.
Mańǵystaýda «Qazaqstan temir joly» ujymy referendýmǵa qatysýdy qoldady