Aýyl sharýashylyǵy mınıstri Aıdarbek Saparovqa S. Seıfýllın atyndaǵy Qazaq agrotehnıkalyq ýnıversıtetinde ótken seleksııa jáne tuqym sharýashylyǵyn damytý máseleleri boıynsha respýblıkalyq keńes aıasynda elimizdegi birinshi agrotehnopark tanystyryldy, dep jazady Egemen.kz.
Agrotehnopark qurý ýnıversıtettiń agrarlyq ǵylymdy damytý, praktıkalyq baǵyttaǵy bilim berýdi jetildirý jáne ekonomıkanyń naqty sektorymen biriktirý salasyndaǵy júıeli jumysynyń zańdy jalǵasy.
Agrotehnoparktiń bıznes-ınkýbasııa, ınnovasııalyq kompanııalardy qoldaý jáne agroónerkásiptik keshen (AО́K) salasyndaǵy joǵary tehnologııalyq jobalardy damytý úshin zamanaýı orta qurýdy kózdeıdi. Ortalyq agrotehnologııalardy synaqtan ótkizýge jáne kórsetýge, jobalardy ǵylymı-zertteý kezeńinen naryqqa deıin súıemeldeýge, bıznes úshin tehnologııalyq táýekelderdi azaıtýǵa jáne ınnovasııalardy laboratorııadan óndiriske tezirek jetkizýge arnalǵan. Agrotehnopark halyqaralyq ǵylymı-tehnologııalyq yntymaqtastyqty damytý baǵytyna da nazar aýdarady.
Aıdarbek Saparov ortalyqtyń ınfraqurylymy, laboratorııalyq bazasy jáne óndiristik-ınjenerlik múmkindikterimen tanysty. Agrotehnoparktiń jalpy aýdany shamamen 1000 sharshy metrdi quraıdy. Onyń qurylymynda tájirıbelik jáne pılottyq jumystarǵa arnalǵan metall óńdeý sehy bar óndiristik-ınjenerlik blok, rezıdentterge arnalǵan keńse keńistigi, sondaı-aq tolyq sıkldi laboratorııalyq keshen qarastyrylǵan.
Oraldyq ǵalymdar jańa agrojoba usyndy
Sondaı-aq quramyna aýyl sharýashylyǵy daqyldaryn molekýlalyq-genetıkalyq zertteý, agrobıotehnologııa jáne mıkrobıologııa zerthanalary, fızıka-hımııalyq taldaý, synama daıyndaý jáne analıtıkalyq zertteýge arnalǵan Qazaqstan-Aýstralııa ınnovasııalyq ortalyǵy kiredi.
Aıdarbek Saparov agrotehnopark qurý isi agrarlyq ǵylymdy jańǵyrtý jáne ǵylymı zertteýlerdi tıimdi naryqqa shyǵarý júıesin qurýdaǵy mańyzdy qadam ekenin atap ótti.
«Búgingi tańda ǵylymı sheshimderdiń laboratorııa qabyrǵasynda qalmaı, aýyl sharýashylyǵy óndirýshisine jetýi jáne naqty ekonomıkalyq nátıje berýi óte mańyzdy. Agrotehnopark ǵalymdar men agrobıznes ókilderin baılanystyratyn kópir bolýǵa tıis», dedi mınıstr.
Agrosaladaǵy aýqymdy jobalar
Ýnıversıtet rektory Qanat Tireýov óz sózinde agrotehnopark AО́K salasynda tehnologııalyq kásipkerliktiń jańa mádenıetin qalyptastyrý, jańa býyn mamandaryn daıyndaý jáne ǵylymı zertteýlerge ınvestısııa tartý úshin jaǵdaı jasaıtynyn atap ótti.
«Ortalyq jas ǵalymdar, startap-komandalar jáne básekege qabiletti otandyq tehnologııalardy jasaý men engizýge qyzyǵýshylyq tanytqan ındýstrıaldy seriktester úshin yntymaqtastyń alańyna aınalady», dedi rektor.
Agrotehnoparktiń qyzmeti aýyl sharýashylyǵy daqyldarynyń jańa sorttary men býdandaryn, zamanaýı bıopreparattar men ınjenerlik sheshimderdi naryqqa jyldam shyǵarý, agroóndiristiń ónimdiligi men turaqtylyǵyn arttyrý, sondaı-aq otandyq AО́K eksporttyq áleýetin nyǵaıtý úshin mańyzdy ról atqarmaq.
Sondaı-aq ýnıversıtet bazasynda «Agrarlyq ǵylym jetistikterin óndiriske engizý – agroónerkásip kesheniniń turaqty damýynyń kepili» atty respýblıkalyq semınar-keńes ótti.
Agroónerkásip keshenin damytý: Sharýalarǵa jyldyq 5%-ben jeńildetilgen nesıe beriledi
Is-sharaǵa «Ulttyq agrarlyq ǵylymı-bilim berý ortalyǵy» aksıonerlik qoǵamy, onyń enshiles uıymdary, ǵylymı qaýymdastyq ókilderi jáne oblys ákimderiniń orynbasarlary qatysty.
Jıynda Aýyl sharýashylyǵy mınıstri Aıdarbek Saparov seleksııa men tuqym sharýashylyǵyn damytý eldiń azyq-túlik qaýipsizdigin qamtamasyz etýdegi negizgi tetik ekenin atap ótti.