Byltyr sáýir aıynda Memleket basshysynyń jastar saıasatyn damytýǵa qatysty tapsyrmasyna saı, Abaı oblysynyń jastar saıasaty máseleleri jónindegi basqarmasy qurylǵan bolatyn. Osy rette, atalǵan basqarmanyń atqarǵan jumystaryna sholý jasaǵan edik.
Basqarma basshysy Oljas Beısenbaevtyń aıtýynsha, bul mekeme – óńirdegi memlekettik jastar saıasatyn iske asyrý, jastardyń bastamalaryn qoldaý, kásibı jáne kásipkerlik daǵdylaryn, olardyń densaýlyǵyn nyǵaıtý, ıntellektýaldyq múmkindigin arttyrýǵa jaýapty organ. Oblysta bul jumys júıeli túrde qolǵa alynyp otyr.
«Qurylǵanyna kóp ýaqyt bolmasa da basqarmanyń oblys jastarymen birge atqarǵan jumysy az emes. Eń birinshi, óńirde jastar salasyndaǵy jumystyń ınstıtýsıonaldy qurylymy nyǵaıdy, jańa úılestirýshi organ quryldy. Basqarma quramyna shtat boıynsha 14 qyzmetker berilip otyr. Jastar salasyna bólinetin qarajat ulǵaıtyldy», deıdi ol.
Basqarmanyń málimetinshe, qazir oblystaǵy NEET sanatyndaǵy jastardyń úlesi (jyl basyndaǵy 2,4 paıyzdan 2,1-ge deıin) tómendetildi. 23 jeltoqsandaǵy «Otbasynyń sıfrlyq kartasy» boıynsha NEET jastardyń sany 2 346 adam boldy. Bul – elimizdegi tómen kórsetkishtiń biri. Al oblystyq, aýdan jáne qalalyq deńgeıdegi barlyq jastar isteri jónindegi keńesterdiń quramy jańartyldy. Ákimdikter janynan jastar isteri jónindegi 13 keńes jumys isteıdi. Onyń quramyndaǵy jastar úlesi ulǵaıtylyp, qoǵamdyq uıym, azamattyq sektor ókilderi qosyldy. Buǵan qosa byltyr oblysta jastarǵa arnalǵan jeńildetilgen ıpotekalyq baǵdarlama qaıtadan iske qosyldy. Oblys ákiminiń tapsyrmasyna sáıkes jeltoqsan aıynda Semeı qalasy ákimdigi men «Otbasy banki» birlesip, jastardy qoldaý maqsatynda 40 páterge qarajat qarastyryp otyr. Sonymen qatar memlekettik baǵdarlamalar, sýbsıdııalanatyn jumys oryndary, granttar («Dıplommen – aýylǵa!», «Serpin», «Jastar praktıkasy», «Táýelsizdik urpaqtary») túsindirilip, arnaıy brıfıng ótti, podkastar shyqty. Jastarǵa berilgen múmkindik týraly býkletter men flaerler, analıtıkalyq ınfografıka daıyndaldy. Osy jumysty Abaı oblysynyń jastar saıasaty máseleleri jónindegi basqarmasy resýrstyq ortalyqtar, tıisti jergilikti atqarýshy organ, aýdan ákimdikteri jáne quqyq qorǵaý organdarymen birlesip atqardy.
«2025 jyly óńirlik jumyspen qamtý kartasy aıasynda 10 698 jas jumysqa ornalasty, onyń ishinde ulttyq jobalar – 1 099, bos jumys oryndaryna – 3 052, Memleket basshysynyń bastamasy boıynsha – 4 070, sýbsıdııalanatyn jumys oryndaryna – 2 414. «Alǵashqy jumys orny» jáne «Urpaqtar kelisimsharty» jobalary boıynsha 277 adam jumysqa ornalasty. Al «Dıplommen – aýylǵa!» baǵdarlamasy aıasynda 99 bıýdjettik kredıt berýge qarajat qarastyryldy. Jergilikti bıýdjet esebinen 315 kóterme járdemaqy tólendi. Bul baǵdarlama 2026 jyly da óńirimizde jalǵasyn tabady», deıdi basqarma basshysy.
Onyń aıtýynsha, jastardyń eńbekke eptiligin arttyrý maqsatynda byltyr óńirde Business.enbek portaly arqyly «Bastaý bıznes» jobasynda 320 jas oqytyldy, 191-i sertıfıkat aldy, áleýmettik osal toptaǵy 63 jasqa 400 AEK kóleminde qaıtarymsyz grant berildi. Qysqamerzimdi kásiptik oqytýǵa 86 jas joldandy, onyń 70-i turaqty jumysqa ornalasty. Skills.enbek.kz portalynda 979 jas tegin onlaın-kýrstarǵa tirkeldi, 951-i aıaqtady.
«Oblysta barlyǵy úsh joǵary oqý orny jumys isteıdi: ekeýi – memlekettik, bireýi – jekemenshik. Jalpy, joǵary oqý ornynyń stýdenttik kontıngent 20 myń adamnan asady. Sonymen qatar 996 sheteldik stýdent, 366 adam «Serpin» baǵdarlamasymen, 71 stýdent qandastar kvotamen bilim alady. Bilim berý mekemelerinde 27 jataqhana jumys isteıdi, oryn tapshylyǵy joq. Qańtar aıynda barlyq jataqhanany aralap shyqtyq, birqatary jóndeýge daıyndalyp jatyr», deıdi Oljas Túsipbekuly.
Mańyzdy baǵyttyń biri – jas býyn ortasyndaǵy quqyqbuzýshylyqtyń aldyn alý, Prezıdenttiń alǵa qoıǵan «Zań men tártip» qaǵıdatyn ornyqty iske asyrý.
«Esirtki, lýdomanııa jáne quqyqbuzýshylyqqa qarsy jumys aıasynda 393 is-shara ótkizilip, 62 210 jas qamtyldy. 17 memlekettik áleýmettik tapsyrys is-sharasy, 10 aqparattyq kezdesý, 8 dóńgelek ústel, 3 reıd, 78 narko-bot jazbasy júzege asyryldy. Internettegi alaıaqtyq, oıynqumarlyq qaterli indet bolyp tur. Ekonomıkalyq tergep-tekserý departamentimen birge ótken «Abaı oblysy – lýdomanııasyz aımaq» forýmynda 200-den asa jas qatysty, 26 adam marapattaldy», deıdi ol.
Patrıottyq jáne rýhanı tárbıe boıynsha «Jeńis shyraǵy – 80 jyl», respýblıkalyq «ASK CAMP» forýmy, jastardyń lańkestikke qarsylyǵyn bildiretin kóshe bıinen «DANCE BATTLE», «Eńbekshi jastar» festıvali ótti. Oblysta kýız oıyny óte úlken qozǵalysqa ıe boldy. «SarbazTALK» chellendji arqyly 10 beınerolık túsirilip, áskerdegi ómirdi jastar aýdıtorııasyna jetkizýge tyrystyq. Kreatıvti alańdar jobasy aıasynda «ERTIS ART» jastar teatrlarynyń festıvali ótti. Jyl sońynda jastar arasyndaǵy úzdikter atalymdar boıynsha oblys ákimi Berik Ýálıdiń alǵyshatymen marapattaldy.
Al Abaı Qunanbaıulynyń 180 jyldyǵy aıasynda Semeı qalasynda «Abaı QUIZ» respýblıkalyq zııatkerlik oıynyna ózimiz de kýámiz. Oǵan 1 080 adam, barlyǵy 180 komanda qatysty. Jalpy, júlde qory 5 mln-ǵa jýyq somany qurady. Mereıtoıǵa 500 volonter tartyldy, is-sharalarda navıgasııa, aqparat jáne medısınalyq kómek kórsetti.
Abaı oblysynyń jastar saıasaty máseleleri jónindegi basqarmasynyń málimetinshe, «Taza Qazaqstan» aksııasy boıynsha 3 myńnan asa jas 200 gektar aýmaqty tazalady. «Semeı ormany» rezervatynda «Halyq» qorymen birge myńdaǵan túp aǵash egildi.
«Jalpy, Abaı oblysynda jastar saıasatyn damytýdyń strategııalyq jospary Memleket basshysy bekitken «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary» qujaty negizinde iske asyrylyp, «Zań jáne tártip», «Adal azamat», «Taza Qazaqstan» qaǵıdattary men volonterlik pen zııatkerlik áleýetti nyǵaıtýǵa basymdyq beriledi», deıdi basqarma basshysy.
2026 jyl Prezıdent bastamasymen Halyqaralyq eriktiler jyly bolyp belgilendi. Osyǵan oraı, birqatar halyqaralyq jáne respýblıkalyq is-sharany ótkizý kózdelgen. Osylaısha, oblys jastaryna serpilis berip, ólkeden shyqqan talanttar qaıta oralyp, ortany toltyrsa, óńirdiń áleýmettik-ekonomıkalyq, zııatkerlik, kreatıvti kúsh-qýatyn arttyrýǵa úles qosady degen úmit mol.
Abaı oblysy