Atyraý oblysynyń Qurmanǵazy aýdanyna qarasty Amangeldi aýylynda 15 jyldan beri ishimdik satylmaıdy, dep habarlaıdy Egemen.kz Ishki ister mınıstrliginiń baspasóz qyzmetine silteme jasap.
Búginde bul mekende 90 turǵyn úıde 480 adam tatý-tátti ómir súrip keledi. Halyq sany az bolǵanymen, aýyzbirshiligi myǵym, qoǵamdyq tártipke degen jaýapkershiligi joǵary.
Aýyldaǵy turaqtylyq pen tynyshtyqtyń saqtalýyna ýchaskelik polısııa ınspektory Serik Gabdýlov te súbeli úles qosyp keledi. Ol turǵyndarmen tyǵyz baılanys ornatyp, profılaktıkalyq jáne túsindirý jumystaryn júıeli túrde júrgizedi.
Eń basty jetistik – ólkede sońǵy tórt jyl ishinde birde-bir qylmys tirkelmegen. Bul – aýyl turǵyndarynyń ózara qurmet pen jaýapkershilikke negizdelgen ómir saltyn tańdaǵanyn aıǵaqtaıdy.
Aýyldyń taǵy bir ereksheligi – sońǵy 15 jyl boıy munda alkogol ónimderi satylmaıdy. Bul bastama aýyl aqsaqaldary men belsendi azamattardyń ortaq kelisimimen qabyldanyp, búginde ıgi dástúrge aınalǵan.
«Ishimdikten bas tartý – qoǵamdyq turaqtylyqtyń, otbasy berekesiniń jáne urpaq tárbıesiniń myzǵymas tiregi bolyp otyr. Aýyl turǵyndary bos ýaqytyn adal eńbekpen, sportpen, ulttyq jáne otbasylyq qundylyqtardy dáripteýmen ótkizedi», delingen habarlamada.
Abaı oblysynda 15 aýyl «ishimdiksiz eldi meken» mártebesin aldy
Aıta keteıik, búginde Atyraý oblysy aýmaǵynda 56 eldimeken alkogolden bas tartqan. Mundaı aýyldarda qoǵamdyq tártip nyǵaıyp, turǵyndar arasyndaǵy ózara syılastyq pen senim arta túsedi.
Túrkistan oblysynda ishimdiksiz aýyldar kóbeıip keledi