Katonqaraǵaı – týrıstik aýdan. Bıyl Altaıdyń asqarlary men alqymynda jatqan aýdannyń joldary jóndelip jatyr. Bul sharýanyń týrıstik salany jandandyrýǵa yqpaly zor, deıdi aýdan ákimi Qalıhan Baıǵonysov. Aıtalyq, aýdan aýmaǵyndaǵy týrısterdi jyl boıy qabyldaıtyn «Rahman qaınary» jáne maýsymdyq «Nurbulaq» shıpajaılary respýblıkalyq joldyń boıynda ornalasqan. Sonymen qatar, 11 pantymen emdeý oryndary, janarmaı quıý stansalary, saýda oryndary, qonaqúıler men meıramhanalar, qymyzhanalar da respýblıkalyq, oblystyq jáne aýdandyq mańyzy bar avtojoldarda oryn tepken.
Jalpy, Katonqaraǵaı aýdanyndaǵy avtokólik jolynyń uzyndyǵy 721,7 shaqyrymdy quraıdy. Onyń ishinde respýblıkalyq mańyzy bar jol – 227 shaqyrym, oblystyq mańyzy bar – 111 shaqyrym jáne aýdandyq mańyzy bar jol 383,7 shaqyrymdy qurap otyr.
«О́skemen – Zyrıan – Úlken Naryn – Katonqaraǵaı – Rahman qaınary» respýblıkalyq jolyn kútip-ustaý jumysy «Qazavtojol» О́JÝ-27 AMK-ge tıesili. Bul baǵyttaǵy joldardy jóndeýge respýblıkalyq bıýdjetten 2 mlrd. teńgeden astam qarjy bólindi. Bıyl mamyr aıynda atalǵan joldyń «399-418 shaqyrym» ýchaskesindegi 20 shaqyrymyna qara jabyndy tóseý jumystary bastaldy. Kúrdeli jóndeýdi «Katonqaraǵaı óndiristik jol ýchaskesi» JShS júrgizýde. Aǵymdaǵy jyly jóndeý jumystaryna 496 mln. teńgeden astam qarajat bólindi.
Jaqynda aýdanǵa jumys saparymyzdyń aıasynda О́rel aýyly janyndaǵy qurylys jumystarymen tanystyq. Aýyl turǵyndarynyń aıtýynsha, О́rel ózenindegi kópir kóktemgi alapat tasqynǵa tótep bere almaıtyndyqtan, jıi sý alyp kete beredi eken. Bıyl atalǵan kópir tolyǵymen aýystyrylyp, jóndeýden ótkizilip jatyr. Biz merdigerlerdiń kópirge deıingi ózen arnasyn keńeıtip jatqanyn baıqadyq. Jol jóndeýshiler qajetti materıaldy jeti shaqyrym jerde ornalasqan tas karerinen tasyp júrgendikterin jetkizdi. Bógettiń uzyndyǵy – 300 metr. Qurylys ýchaskesiniń brıgadıri Andreı Trýdnıkovtiń aıtýynsha, kópir kúzge deıin aıaqtalady. Munda kran, býldozer, KamAZ tehnıkalary jumys istep jatyr eken. Qazirgi kezde kópirdiń betondaý-montajdaý jumystary júrgizilýde. Al О́rel men Berel aýyldarynyń ortasy – 20 shaqyrym. Bıyl osy joldy salýǵa 2 mln. 800 myń teńge bólinipti. Aǵymdaǵy jyly 6 shaqyrymyn jasamaq. Eki jolaqty bolatyn jol qurylysynda 35 adam, 15 tehnıka jumys istep jatyr, dedi merdiger kompanııa ókili Nurjan Musabaev. Ázirge jol jamylǵysy salynyp, kópir men qubyrlar ornatylýda. Sondaı-aq, aýdanda «Úlken Naryn – Kúrshim» jolynyń 23 shaqyrymyna jabyndy tóseý jumystary júrgizilýde. Oǵan respýblıkalyq bıýdjetten 330 mln. teńge qarajat bólingen. Al aýdandyq dárejedegi joldardy kútip-ustaý jumystarymen «Naryn-Servıs» JShS aınalysady. Bıyl jergilikti jelidegi joldarǵa aǵymdaǵy jóndeý jumystaryn júrgizýge aýdan bıýdjetinen 42 mln. teńge bólindi. Osy arqyly Jańa úlgi – Jambyl – Berel baǵytyndaǵy 20 shaqyrym, Novopolıakovka – Ýlıanovka baǵytyndaǵy 13 shaqyrym, Novopolıakovka – Sennoe baǵytyndaǵy 14 shaqyrym jol jóndelmek. Aıta keterligi, Altaıǵa alystan keletin týrısterge qolaıly jaǵdaı jasaý maqsatynda Úlken Naryn aýylynda áýejaı ǵımaraty men ushý alańynyń qurylysyna arnalǵan tehnıkalyq-ekonomıkalyq negizdeme jobasy ázirlendi. Eger atalǵan joba sátimen júzege asar bolsa, keleshekte týrıster men jolaýshylar aýdanǵa ushaqpen keletin múmkindikke ıe bolady.
Dýman ANASh, «Egemen Qazaqstan».
Shyǵys Qazaqstan oblysy, Katonqaraǵaı aýdany.