Pavlodar qoımalarynda 50 myń tonna kartop pen 30 myń tonna sábiz saqtalyp tur. Bul oblys turǵyndarynyń kúzge deıingi qajettiligin tolyq qamtamasyz ete alady.
Qazir oblysta jalpy syıymdylyǵy 550,9 myń tonnany quraıtyn kókónis qoımalary jumys isteıdi. Sonyń ishinde 133 qoıma (483,8 myń tonna) zamanaýı qural-jabdyqtarmen qamtamasyz etilgen. Budan bólek, 13 qoıma (58 myń tonna) arnaıy tońazytqysh qondyrǵylarymen jabdyqtalǵan. Jalpy alǵanda, kókónis saqtaý ınfraqurylymy jetkilikti deńgeıde damyǵan.
– Byltyr Pavlodar oblysynda 711,5 myń tonna kartop, 146,6 myń tonna sábiz jınaldy. О́ńir turǵyndaryna jylyna 75,4 myń tonna kartop qajet ekenin eskersek, qamtamasyz etý deńgeıi qajettilikten 11 ese joǵary. Sábizge degen jyldyq qajettilik 17,3 myń tonna bolsa, qamtamasyz etilýi – odan 10 ese kóp. Artyq ónim syrtqa satylady. О́tken jyly oblys sharýalary 183,4 myń tonna kartopty О́zbekstan, Reseı, Túrikmenstan men Tájikstan elderine eksporttady. Sondaı-aq О́zbekstan, Reseı, Qyrǵyzstan baǵyttaryna 24,5 myń tonna sábiz jóneltildi. Al jyl basynan syrtqa 36,7 myń tonna kartop pen 4,6 myń tonna sábiz jiberilgen. Bul kórsetkishter óńirdiń eksporttyq áleýetiniń joǵary ekenin baıqatyp otyr, – deıdi oblystyq aýyl sharýashylyǵy basqarmasy basshysynyń orynbasary Tólegen Kósherbaev.
Basqarma dereginshe, qazir jergilikti kókónis qoımalarynda 50,4 myń tonna kartop pen 30 myń tonna sábiz saqtalyp tur. Mamandar bul oblys halqynyń jańa ónim alynǵanǵa deıingi qajettiligin tolyq qamtamasyz etýge jetkilikti deıdi.
Oblysta atalǵan ónimder boıynsha kóterme baǵalar turaqty deńgeıde saqtalyp turǵany baıqalǵan. Kartoptyń bir kılosy 115-130 teńge aralyǵynda bolsa, sábiz – 130-150 teńge.
Atap óterligi, aldaǵy egis naýqanynda tuqymǵa 60,9 myń tonna kartop qajet. Atalǵan kólem qazirdiń ózinde daıyn tur. Al sábiz tuqymy kóktemgi egis jumysynyń kólemine qaraı satyp alynady.
Pavlodar oblysy