Shalqar aýdanynyń ortalyǵynda V.N.Sehanovıch atyndaǵy sport kesheni ashyldy. Boks, dzıýdo, grek-rım kúresi sııaqty olımpıadalyq sport túrlerimen bir mezette júzden astam bala jattyǵýǵa laıyqtalǵan birneshe zaly, kıim aýystyratyn bólmeleri men 300 oryndyq trıbýnasy bar jańa keshen ashylǵanyna jurtshylyq qatty qýandy.
Osyǵan deıin balalar 1904 jyly OrynborTashkent temirjoly ótkizilgen kezde salynǵan eski ǵımaratta jattyǵyp kelgen. Aýdanda sportqa qushtar jas kóp bolǵanymen, aýmaǵy 300 sharshy metrden aspaıtyn eski ǵımaratqa olardyń bárin syıǵyzý múmkin emes edi. Bul jaıynda 2023 jyly oblys ákimi Ashat Shaharov Shalqar aýdanyna kelgen saparynda №1 balalar men jasóspirimder sport mektebi tárbıelenýshileriniń ata-analary qulaqqaǵys etken edi. Kóp keshikpeı jańa keshen qurylysy bastalyp, úsh jylǵa jeter-jetpes ýaqytta paıdalanýǵa berildi.
Saltanatty is-sharaǵa Samara qalasynan arnaıy kelgen Vladımır Sehanovıchtiń qyzy Elena Sehanovıch Shalqar aýdany tur-ǵyndarynyń 1970–1990 jyldary talantty sportshy tárbıelegen áke esimin umytpaı otyrǵandaryna rızashylyǵyn bildirdi. Bul jerde Vladımır Sehanovıch mektep oqýshylaryn grek-rım kúresine baýlyp, talaı talantty sportshylardy tárbıelep shyǵardy. Olardyń arasynan marqum Esengeldi Batyrǵarın ozyp shyǵyp, KSRO halyqtary Spartakıadasynyń bes dúrkin chempıony boldy. Osy mekteptiń izgi dástúrin keıin Qazaqstannyń eńbek sińirgen sport sheberi, Olımpıada oıyndarynyń qatysýshysy Meırambek Aınaǵulov pen álem chempıony Qýanyshbek Jańajol jalǵastyrdy.
Jańa da zamanaýı jabdyqtalǵan keshenge halyqaralyq sa-ıystarda elimizdiń kók baıraǵyn jelbiretetin talantty da, talapty balalar kóptep keledi degen senim bar.
Aqtóbe oblysy