Barlyq deńgeıdegi máslıhat depýtattarynyń III respýblıkalyq forýmynda Qasym-Jomart Toqaev agroónerkásip sektoryn jan-jaqty damytý memleket saıasatyndaǵy negizgi basymdyq bolyp qala beretinin atap ótti, dep habarlaıdy Egemen.kz.
Prezıdenttiń aıtýynsha, 7,4 mıllıon azamatymyzdyń turmys-tirshiligi, ıaǵnı turǵyndardyń 36 paıyzy jáne elimizdiń azyq-túlik qaýipsizdigi osy salanyń órkendeýine tikeleı baılanysty.
«Sońǵy jyldary bul salaǵa bólingen qarjy kólemi eselep artty. Atap aıtqanda, byltyr sharýalarǵa jeńildetilgen nesıe berý úshin 1 trıllıon teńgeden astam qarajat bólindi. Aýyl sharýashylyǵy eńbekkerlerine buryn-sońdy dál osyndaı orasan zor qoldaý kórsetilmegen. Muny sharýalardyń ózderi de aıtyp júr.
Biraq óndiris kólemin ulǵaıtýmen shektelýge bolmaıdy. Biz zaman talabyna saı keletin, ozyq tehnologııaǵa negizdelgen agrarlyq-ındýstrııalyq ekonomıka qurýymyz kerek. Bul – asa mańyzdy mindet. О́nimderimiz ishki naryqtyń suranysyn tolyq ótep, shetelge de turaqty shyǵarylýǵa tıis.
Byltyr aýyl sharýashylyǵy salasynda 250 óndiris ashyldy. Sonyń arqasynda aımaqtar tyń serpinmen ósip-órkendep, halyqtyń ál-aýqaty arta túsedi», dedi Memleket basshysy.
Memleket basshysy: Bıyldan bastap aýyldyq okrýgter qosymsha tabys kózine ıe bolmaq
Qasym-Jomart Toqaevtyń sózinshe, memlekettiń júıeli jumysynyń nátıjesinde aýyl sharýashylyǵy salasyna álemdegi ozyq kompanııalar qyzyǵýshylyq tanyta bastady. Mysaly, shetel ınvestorlarynyń atsalysýymen Almaty, Aqmola, Jambyl, Soltústik Qazaqstan oblystarynda jáne Shymkent qalasynda shıkizatty tereń óńdeıtin jáne azyq-túlik shyǵaratyn iri kásiporyndar iske qosylady.
«Bul jobalarǵa 1 mıllıard dollardan astam qarajat salyndy. Osylaısha, ondaǵan myń adam jumyspen qamtylady», dedi Prezıdent.
Halyqtyń senimin aqtaýdan artyq abyroı joq: Memleket basshysy máslıhat depýtattaryna ne dedi?