Almatyda ádebıet synshysy, pýblısıst, kompozıtor Tursynjan Shapaı týraly «qonyr media group» túsirgen «Taýdan túsken sáýle» atty derekti fılmniń kórsetilimi ótti. Týyndy keıipker taǵdyry arqyly týǵan jerge degen saǵynyshtyń, ulttyq jady men rýhanı tamyrdyń tereńdigin beıneleıdi.
«Táńiriniń qudiretin tanyǵyń kelse, taýǵa shyq» demeýshi me edi. Taý shyńdarynda jer-degi usaq-túıek másele-lerden arylyp, janyńa qýat tabasyń. Fılm keıipkeri de jan daýasyn týǵan jer baýraıyndaǵy asqaq shyńdardan, jazıra jotalardan izdeıdi.
«Taýǵa kelgende túnde juldyzǵa, kúndiz kúnge jaqyndaǵandaı kúı keshesiń. Bitip bolmas bar qamyńdy, mazasyz tirliktegi usaq-túıek bar keıis, ókpe-renishińdi, tipti osy sátke deıingi bar ǵumyryńdy asqarlardyń ar jaǵynda, túý tómende munartqan shyńyraý eteginde qaldyryp, kók pen jerdiń sheginde turǵan myna bıikke janyńdy nurmen shaıǵandaı sergip, serpilip shyǵasyń», dep tebirenedi keıipker.
Tekes ózeniniń bastaýynda túsirilgen týyndy kórermendi Jetisýdyń tumsa tabıǵatyna tamsandyryp, adam men týǵan topyraq arasyndaǵy kórinbes baılanysqa oı júgirtedi. Shubartal, Kókkemer, Beltóbe jaılaýy, Labasy sekildi jer ataýlary arqyly tabıǵat pen taǵdyr, tarıh pen tulǵa bir arnada toǵysqan.
Fılmde Tursynjan Shapaıdyń rýhanı qalyptasýyna áser etken ákesi Muqan aqsaqaldyń Abaı óleńderin jatqa aıtýy, «Abaıdy oqy» degen ósıeti de erekshe maǵynamen kórinis tabady. Bul – Abaıtanýdyń ǵana emes, urpaqtan-urpaqqa jalǵasqan ulttanýdyń da aıqyn úlgisi. Taýdyń bıiginen adam óz ómirine, óz bolmysyna basqa qyrynan qaraıtyny týraly keıipker tolǵanysy kórermendi de tereń oıǵa jeteleıdi. Osy turǵydan alǵanda fılm – tulǵataný sheńberinen asyp, qazaq dalasynyń rýhanı keńistigin tanytqan kórkem beıneesse ispetti.
Fılm avtory jáne rejısseri – Serjan Moldasanuly, qoıýshy-rejısser – Atlan Bulybaev, redaktory – Aıagúl Ramazanqyzy, operatorlary – Ashat Dáýrenbekov, Arsen Sandybaev, Nuralı Baqyt, prodıýsseri – Gúlzat Qarǵabaeva, ákimshi – Mahabbat Qurmanǵalı.
Kórsetilim barysynda qoǵam qaıratkeri Nurlan Orazalın týyndy el men jerdiń rýhyn sóıletkenin atap ótti. Sondaı-aq Parlament Senatynyń tóraǵasy Máýlen Áshimbaevtyń Tursynjan Shapaıǵa arnaǵan lebiz haty tabystaldy. Shynynda da, «Taýdan túsken sáýle» tabıǵattyń asqaq kórki arqyly halyqtyń tarıhı jadyn, adamgershilik pen tazalyq sekildi máńgilik qundylyqtardy jańǵyrtqan rýhanı dúnıe. Búgingi qarbalas zamanda mundaı týyndylar adamdy óziniń túp-tamyryna, týǵan jerdiń bıik bolmysyna qaıta úńilýge shaqyratyndaı.
ALMATY