«Astana Musical» memlekettik teatry kórermenge «Sulu: hor-konsert» atty erekshe mýzykalyq jobasyn usyndy. Teatr ártisteri daıyndaǵan bul kesh dástúrli konsert formatynan ózgeshe, mýzyka men teatr ónerin sheber ushtastyrǵan teatrlandyrylǵan qoıylym retinde ótti.
Kesh shymyldyǵy ashylǵan sátten-aq kórermen aıryqsha shyǵarmashylyq atmosferaǵa endi. Sahnadaǵy ár nómir mýzykalyq oryndaý, akterlik sheberlik pen bı elementteri arqyly kórkem órilip, hor óneriniń jańa qyryn tanytty. Ártisterdiń úılesimdi oryndaýy, sahnalyq plastıkasy men mýzykalyq dramatýrgııasy keshke aıryqsha kórkemdik sıpat bergen jobanyń bas hormeısteri – Almat Ábishev.
Konserttik baǵdarlama mazmuny jaǵynan da alýan túrli boldy. Qazaqtyń halyq ánderi horǵa laıyqtalǵan jańa ınterpretasııada shyrqalyp, ulttyq mýzykanyń baı murasy tyń qyrynan ashyldy. «Kerim-aý aıdaı», «Kóksholaq», «Djýlııa», «Eki jıren» sekildi halyqqa keńinen tanys ánder hordyń qýatty únimen erekshe áser qaldyrdy.
Sonymen qatar konsertte álemdik estrada men pop-mýzyka klassıkasynyń tanymal týyndylary da oryndaldy. Atap aıtqanda, Maıkl Djekson, Freddı Merkıýrı, Pol Makkartnı shyǵarmalary kórermenge hor formatynda usynyldy. Ásirese álemge áıgili «Billie Jean» ániniń kópdaýystaǵy erekshe óńdeýi kórermenniń zor qoshemetine ıe boldy.
Baǵdarlamada sondaı-aq mıýzıkl arııalary, retro-kompozısııalar men álemdik mýzyka klassıkasynyń zamanaýı óńdeýleri oryndalyp, jandy daýystaǵy vokal, bı, sahnalyq áreket arqyly áserli kórkemdik sheshimder usynyldy. Aıtýly konsert hor óneriniń múmkindigi keń ekenin, onyń zamanaýı sahna keńistiginde jańa sıpatqa ıe bola alatynyn aıqyn kórsetti.