Barlyq deńgeıdegi referendým komıssııalary respýblıkalyq referendýmdy ótkizýge daıyndyq jumystaryn aıaqtady. Bul týraly Ortalyq referendým komıssııasynyń otyrysynda habarlandy, dep jazady Egemen.kz.
«Barlyq deńgeıdegi referendým komıssııalary daıyndyq jumystaryn aıaqtady. Qajetti uıymdastyrýshylyq is-sharalar júrgizildi, komıssııalardyń qyzmetine ádistemelik qoldaý qamtamasyz etildi, daýys berý rásimderin qoldaný men referendým týraly zań talaptaryn saqtaýda biryńǵaı tásil qalyptastyryldy. Bul bizdiń respýblıkalyq referendýmdy ótkizýge jáne ony zań talaptaryna qatań sáıkes uıymdastyrýǵa tolyq daıyn ekenimizdi aıtýǵa múmkindik beredi», dedi Nurlan Ábdirov.
Daıyndyqtyń negizgi baǵyttarynyń biri komıssııa múshelerin oqytý boldy. Kúntizbelik josparǵa sáıkes, 13 naýryzda oqytýdyń qorytyndy kezeńi aıaqtaldy. Jedel aqparatqa sáıkes daıyndyq barysynda 5 800-den astam oqytý semınary ótkizilip, oǵan ártúrli deńgeıdegi komıssııalardyń 71 myńnan astam múshesi qatysty. Daıyndyq deńgeıin qosymshabaǵalaý maqsatynda qashyqtan onlaın-testileý uıymdastyryldy.
Naýryznama onkúndigi aıasynda «Referendým – 2026» atty onlaın marafon ótedi
ORK Tóraǵasynyń aıtýynsha, iske asyrylǵan kaskadtyq oqytý júıesi el boıynsha komıssııa múshelerin daıarlaýdyń biryńǵaı standarttaryn qamtamasyz etýge múmkindik berdi.
Referendýmǵa daıyndyq aıasynda zańnamada kózdelgen baıqaý júrgizýge qajetti jaǵdaılar qamtamasyz etildi. Referendým ýchaskelerinde bolýǵa quqyǵy bar ókilderi qatysa alatyn qoǵamdyq birlestikter men kommersııalyq emes uıymdardy akkredıtteý júrgizildi. Búgingi tańda 256 uıym akkredıtteldi, onyń ishinde 11-in Ortalyq referendým komıssııasy, al 245-in aýmaqtyq komıssııalar akkredıttedi.
Referendým qarsańynda táýelsiz baqylaýshylardyń aqparattyq shtaby jumys isteıdi
Otyrys sońynda daýys berý kúni Ortalyq referendým komıssııasy dástúrli túrde tikeleı efırde buqaralyq aqparat quraldaryna el boıynsha daýys berý barysy týraly ár eki saǵat saıyn aqparat berip otyratyny atap ótildi. Aqparat beriletin naqty ýaqyt aldyn ala jarııalanady.