Erbol Hamıtov Italııada ótip jatqan 2026 jylǵy Paralımpıada oıyndarynda altyn medal jeńip aldy, dep súıinshileıdi Egemen.kz.
Otandasymyz para bıatlon jarysynda jeńis tuǵyrynyń eń bıik satysyna kóterildi. Erbol Hamıtov 4,5 shaqyrymdyq iz kesý jarysynda (otyryp jarysý sanaty) úzdik nátıje kórsetip, chempıon atandy.
Jarysta qara úzgen jeńimpaz ýkraınalyq Taras Radty, qytaılyq Szysıýı Lıýdi shań qaptyrdy.
Aıta keteıik, buǵan deıin Erbol Hamıtov osy Paralımpıada oıyndarynda para shańǵy jarysynan qola medaldi jeńip alǵan edi. Osylaısha qazaqstandyq sportshy bir jarystyń ózinde eki júlde qorjynǵa saldy.
Erbol parasportqa 2018 jyly kelgen. Sodan beri qysqy sport túrlerinde tabandy daıyndalyp, halyqaralyq jarystarda kózge tústi. 2022-2023 jylǵy qysqy maýsymda para bıatlon men para shańǵydan álem kýbogi kezeńderinde birneshe márte jeńis tuǵyryna kóterildi. Keıin álem chempıonatynda da úzdik shyǵyp, Qazaqstan sporty tarıhynda osy baǵyt boıynsha jahandyq deńgeıdegi alǵashqy chempıon atandy. Buǵan deıin bul beles otandastarymyz úshin alynbaı kelgen edi.
2024-2025 jylǵy maýsym qorytyndysynda Erbol para bıatlonnan álem kýboginiń jalpy esebinde kósh bastap, araǵa 31 jyl salyp elimizge mártebeli Hrýstal globýsty ákeldi. Al qazir Mılanda ótip jatqan qysqy Paralımpıada oıyndarynda top jaryp, jeńis tuǵyrynan kórinip, Qazaqstannyń kók týyn bıikke kóterdi.