Jarysta jerlesimiz Kereıhan Qabdýlla jasóspirimder arasynda synǵa túsip, HS-70 tuǵyrynan sekirýde 251,5 upaı enshiledi. О́z qatarlastarynan ozyq shyqqan Kereıhan týrnır chempıony atansa, kúmis medaldy polıak Mılosh Malıaj (249,6), qola júldeni taǵy bir otandasymyz Aleksandr Fılonenko (242,3) oljalady.
Trektegi velosporttan elimiz quramasy Fılıppınniń Tagaıtaı qalasynda ótetin Azııa birinshiliginde baq synaıdy. Ulttyq qurama sapynda Álisher Jumaqan, Danııar Shaıahmetov, Ramıs Dinmuhamedov, Maksım Horoshavın, Dmıtrıı Noskov, Ilıa Qarabutov, Kırıll Kýrdıdı, Dmıtrıı Rezanov synǵa tússe, áıelder dodasyna Rınata Sultanova, Marııa Elkına, Angelına Býrenkova qosylady. Qurlyq dodasy 21–31 naýryz aralyǵynda uıymdastyrylady.
Naýryzdyń 25–29 kúnderi aralyǵynda Chehııa astanasy – Praga qalasynda mánerlep syrǵanaýdan álem chempıonaty ótedi. Italııadaǵy Olımpııa oıyndarynda olja sala almaǵan sportshylardyń basyn qosatyn jahandyq jarystyń bási joǵary. Halyqaralyq konkıshiler odaǵynyń málimetinshe, elimizden álem chempıonatyna Dıas Jırenbaev pen Sofıa Samodelkına qatysady. Aqpan aıynda el abyroıyn asqaqtatyp, aq Olımpıadanyń altyn medalin tartý etken jerlesimiz Mıhaıl Shaıdorov jahandyq dodaǵa qatyspaıdy.
Chernogorııanyń Býdva qalasynda bokstan «Montenegro Cup» halyqaralyq týrnıri márege jaqyndap keledi. 20 salmaq dárejesinde júldege talasqa túsip jatqan qyzdar arasynda Gúlnaz Bóribaeva (48 kg), Jansaıa Rahymberdi (51 kg), Tomırıs Myrzaqul (54 kg), Ásem Tańatar (65 kg), Anastasııa Baıazıtova (70 kg), Jibek Jarasqyzy (80 kg), erler synynda Aǵajan Qadyr (70 kg) men Salaýat Tilekbaı (80 kg) júlde úshin jekpe-jekke túsedi. Fınaldyq oıyndar 21 naýryzda ótedi.
Elordada konkımen júgirýden el chempıonaty bastaldy. Erler dodasynda 500 metrde astanalyq Artýr Galıev chempıon atansa, qyzdar synynda Krıstına Sılaeva (Astana) top jardy. 1 500 metrge júgirýde Nuraly Aqjol (Astana) qara úzip kelse, qyzdar arasynda Arına Ilıashenko myqtylyǵyn kórsetti.