Memleket basshysynyń Jarlyǵymen eldiń saıası, áleýmettik-ekonomıkalyq damýyna qosqan eleýli úlesi jáne belsendi qoǵamdyq qyzmeti úshin birqatar qoǵam qaıratkeri memlekettik nagradalarmen marapattaldy.
Jańa Konstıtýsııanyń qabyldanýyna oraı Memlekettik keńesshi Erlan Qarın Prezıdent atynan Konstıtýsııalyq komıssııanyń birqatar múshesine, BAQ jáne qoǵam ókilderine memlekettik nagradalar tapsyrdy.
Atap aıtqanda, Konstıtýsııalyq sot sýdıasy Qaırat Jaqypbaev III dárejeli «Barys» ordenimen marapattaldy.
Konstıtýsııalyq sot tóraǵasynyń orynbasary Baqyt Nurmuhanov, Prezıdent janyndaǵy Ortalyq kommýnıkasııalar qyzmetiniń dırektory Asqar Omarov, Prezıdent janyndaǵy Qazaqstan strategııalyq zertteýler ınstıtýtynyń dırektory Jandos Shaımardanov, M.S.Nárikbaev atyndaǵy QazGZÝ basqarma tóraǵasy Talǵat Nárikbaev, «Ulttyq rýh» qoǵamdyq birlestiginiń jetekshisi Aıat Súgirbaı «Parasat» ordenine ıe boldy.
«Jibek Joly» telearnasynyń dırektory Erkejan Kúntýǵan «Qurmet» ordenimen nagradtaldy.
M.S.Nárikbaev atyndaǵy QazGZÝ ýnıversıtetiniń professory Almas Jumaǵalı, Uni-Q Group medıaholdınginiń bas dırektory Muhamedqalı Taýan «Eren eńbegi úshin» medalimen marapattaldy.
Prezıdent janyndaǵy Qazaqstan strategııalyq zertteýler ınstıtýtynyń bólim basshysy Janar Sanhaevaǵa, Prezıdenttik mádenıet ortalyǵynyń mamany Dastan Qonysbaevqa Prezıdent Alǵysy jarııalandy.
Erlan Qarın marapat ıelerin quttyqtap, referendýmda azamattarymyz qabyldaǵan jańa Konstıtýsııa bizdiń qoǵamnyń prezıdenttik reformalar tóńiregine toptasyp, tutasa túsetinin taǵy bir márte rastaǵanyn atap ótti.