ASTANA. 13 mamyr. Búgin ÝEFA Chempıondar lıgasynyń jartylaı fınaldyq básekesi aıasynda ekinshi qarymta oıyn ótedi. Soǵan sáıkes, Ispanııa astanasy – Madrıdte jergilikti «Real» men «Iýventýs» (Týrın, Italııa) fınal joldamasyn sarapqa salady. Bul týraly egemen.kz habarlady. Týrnırdiń fınalyna Lıonel Messı bastaǵan «Barselona» komandasy shyǵyp qoıǵany belgili. Olar jartylaı fınalda Mıýnhenniń «Bavarııasyn» aınalyp ótti. Al «Real» men «Iýventýs» arasyndaǵy oıynnan keıin katalonııalyqtardyń fınaldaǵy qarsylasy belgili bolady. Týrınde bolǵan alǵashqy oıynda alań ıeleri 2:1 esebimen jeńgeni esimizde. Sondyqtan búgin Italııanyń komandasy sál de bolsa basymdyqqa ıe. Osy rette ádettegideı, búgingi oıyndaǵy keıbir qyzyqty derekterge nazar aýdarýdy jón sanadyq.
Qos komanda Chempıondar lıgasynyń 2013-2014 jylǵy maýsymynda bir topqa tústi. Sol kezde Madrıdtegi oıynda alań ıeleri 2:1 esebimen basym túsken bolatyn. Al Týrınde qarsylastar teń tarqasty (2:2). Búginge deıin týrnır aıasynda «Real» men «Iýventýs» 17 márte kezdesken. Madrıdtikter óz alańynda 5 ret jeńiske jetip, 2 oıynda ese jibergen. Atalǵan 5 jeńistiń barlyǵy bir dop aıyrmashylyǵymen tirkelgenin aıta keteıik. «Iýventýs» 2002-2003 jylǵy maýsymnan beri Chempıondar lıgasynyń jartylaı fınalyna shyqqan joq. Sol kezde de týrındikter fınal joldamasy úshin «Realmen» oınaǵan edi. Madrıdte ótken alǵashqy oıynda 1:2 esebimen ese jiberip, óz alańyndaǵy qarymta matchta jeńiske jetti (3:1). Nátıjesinde týrnırdiń fınalyna shyqty. Massımılıano Allegrı jattyqtyratyn «Iýventýs» Lıga aıasynda syrt alańda ótkizgen sońǵy 3 oıynda qaqpasyna gol jibergen joq. Toptyq kezeńde «Malmeni» 2:0 esebimen jeńse, 1/8 fınalda Dortmýndte jergilikti «Borýssııanyń» qaqpasyna jaýapsyz 3 gol soqty. Al shırek fınalda «Monakomen» teń oınady (0:0). «Realdyń» qazirgi bas jattyqtyrýshysy Karlo Anchelottı 1999-2001 jyldar aralyǵynda «Iýventýsti» jattyqtyrdy. Anchelottı myrza ártúrli komandalardy jattyqtyryp júrip, «Iýventýske» qarsy 25 oıyn ótkizgen. Sonyń 6-ýynda onyń komandasy jeńiske jetse, 7 márte teń esep tirkelgen. Al 12 ret jattyqtyrýshydan tálim alǵan fýtbolshylar «Iýventýsten» jeńilgen eken. Onyń sońǵysy apta buryn tirkelgeni belgili. «Iýventýs» sapyndaǵy Alvaro Morata «Real» fýtbol mektebiniń túlegi. Ol týrındikterdiń qataryna ótken jyldyń jazynda qosyldy. Oǵan deıin «Real» sapynda 37 oıyn ótkizip, 10 gol soǵyp úlgergen.Oıyn Astana ýaqyty boıynsha saǵat 00:45-te bastalady. Elaman Qońyr. Derek: egemen.kz. Sýret: eurosport.ru.
Komandalar myna quramda alańǵa shyǵýy múmkin.