Qasym-Jomart Toqaev Túrkistan oblysynyń áleýmettik-ekonomıkalyq damý qarqynyn joǵary baǵalap, óńirde ınvestısııa tartý, ınfraqurylymdy damytý jáne halyqty negizgi qyzmettermen qamtý baǵytynda aıtarlyqtaı nátıjeler bar ekenin atap ótti, dep habarlaıdy Egemen.kz.
«Kóne shahardyń biregeı tarıhı kelbetin saqtaý, mádenı murasyn qorǵaý jáne jalpy osy oblysty turaqty damytý – elimiz úshin mańyzy zor mindetterdiń biri. Men ózim Memleket basshysy retinde bul máselege aıryqsha mán beremin.
Bir jyl buryn Túrkistan qalasynyń erekshe mártebesi týraly arnaıy Zań qabyldadyq.
Búginde oblystyń damý qarqyny jalpy jaqsy dep aıtýǵa bolady, kóptegen jumys istelip jatyr. Ákim Nuralhan Kósherov belsendi túrde jumysqa kiristi, ózi jergilikti ahýalmen tanys, jumysynyń nátıjesi sátti bolady dep oılaımyn», dedi Memleket basshysy.
Byltyr aımaq ekonomıkasy 14 paıyzǵa ósti. Barlyq salada jaqsy kórsetkishter paıda bolyp jatyr. Salyq túsimi alǵash ret 1 trıllıon teńgeden asty. Aımaqqa 1,7 trıllıon teńge ınvestısııa tartyldy.
«Úkimettiń málimeti boıynsha oblystaǵy eldi mekenniń basym kópshiligi taza aýyz sýmen qamtyldy. Biraq keıbir aýdanda áli de túıtkilder bar eken, tıisti mınıstrlik ákimdikpen birge bul máselelerdi tez arada sheshýi qajet. Al tabıǵı gaz jóninde aıtsaq, oblys halqynyń 90 paıyzǵa jýyǵy qamtylǵan.
Budan bólek, aımaqta 83 áleýmettik nysan ashyldy. «Keleshek mektepteri» ulttyq jobasy aıasynda 16 bilim ordasy salyndy. Aýyldyq jerlerde 35 densaýlyq saqtaý nysany iske qosyldy», dep atap ótti Prezıdent.
Aıta keteıik, búgin Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóıledi.