Qasym-Jomart Toqaev Túrkistan oblysy jurtshylyǵymen kezdesýde óńirdegi bý-gaz qondyrǵysynyń qurylysy sozylyp ketkenin atap ótip, Úkimet pen «Samuryq-Qazynaǵa» jobany jedeldetip, qatań baqylaýǵa alýdy tapsyrdy, dep habarlaıdy Egemen.kz.
«70 jyldan beri jóndeý jumystary jasalmaǵan Kentaý jylý energııa ortalyǵyn jańǵyrtýǵa qomaqty qarjy bólindi.
Sondaı-aq taǵy bir mańyzdy másele. Oblysta salynyp jatqan bý-gaz qondyrǵysynyń qurylysyn tezdetý kerek. Jumys sozylyp ketti. Úkimetke jáne «Samuryq-Qazynaǵa» osy máseleni qatań baqylaýǵa alýdy tapsyramyn», dedi Memleket basshysy.
Prezıdenttiń aıtýynsha, jalpy, aımaqta túrli óndiris kásiporyndary ashylyp, júzdegen adam birtindep jumyspen qamtylyp jatyr. Munyń bári de – el ishinde bolyp jatqan naqty jumystyń kórinisi.
«Men árdaıym aıtyp júremin: aımaqtarymyz qýatty bolsa, memleket te myqty bolady. Bul bizdiń jetistikterimizdiń negizgi formýlasy dep aıtsaq, artyq bolmaıdy. Sondyqtan óńirlerdiń ekonomıkasyn nyǵaıtyp, halyqtyń ál-aýqatyn jaqsartý memlekettiń basty nazarynda turatyn strategııalyq maqsat bolyp qala bermek», dedi Q.Toqaev.
Aıta keteıik, búgin Memleket basshysy Qasym-Jomart Toqaev Túrkistan oblysyna jumys saparymen baryp, Qoja Ahmet Iаsaýı kesenesine zııarat etti.
Sonymen qatar Qasym-Jomart Toqaev Túrkistan oblysy jurtshylyǵymen kezdesýde Túrkistannyń tarıhı ári rýhanı mańyzyna toqtalyp, bul óńirge erekshe yqylasy bar ekenin atap ótti.