Senat Tóraǵasy Máýlen Áshimbaev depýtattar tobymen birge Naýryz meıramyna arnalǵan merekelik is-sharalarǵa qatysty. Depýtattar qazaq halqynyń mádenı murasy men merekege oraı uıymdastyrylǵan «Etnoaýyl» kórmesin aralap kórdi. Sonymen qatar osy kúni «EXPO» kórme ortalyǵynda halyqtyq serýender ótip, túrli ınteraktıvti sharalar uıymdastyryldy, dep habarlaıdy Egemen.kz.
Is-shara barysynda Máýlen Áshimbaev Naýryz merekesiniń eldi jańǵyrtýdyń jańa kezeńimen tuspa-tus kelýiniń máni zor ekenin atap ótti. Sondaı-aq Senat Tóraǵasy Naýryzdyń el jańǵyrýy men ulttyq qundylyqtardy dáripteý aıasyndaǵy birlik, baýyrlastyq jáne yntymaq merekesi ekenin jetkizdi.
Aıta ketý kerek, etnoaýylda elorda turǵyndary men qonaqtary úshin uzyndyǵy 12 metrlik jaryqdıodty týnnel ornatylǵan. Bul týnnel syrtqy álem men merekeniń ınnovasııalyq ekojúıesin, sondaı-aq Qazaqstannyń tehnologııalyq keleshegin baılanystyratyn sımvolıkalyq ótkel qyzmetin atqarady. Munda kelýshilerge ulttyq tarıhty, dástúrli kıimderdi, qolóner men salt-dástúrlerdi tanystyratyn taqyryptyq ekspozısııalar usynylǵan.
«Jeti qazyna» atty golografııalyq kórme ulttyq kodtyń zamanaýı úlgide jańasha túsindirilýin kórsetedi. Immersıvti tehnologııalar arqyly jeti qasıetti qundylyq tek jádiger retinde ǵana emes, qazaq halqynyń dúnıetanymynyń negizi retinde usynylǵan. Bul sıfrlyq ekspozısııa ǵasyrlar boıy urpaqtan-urpaqqa jalǵasqan rýhanı mura men fılosofııany jańǵyrtady.
Sondaı-aq jasandy ıntellekt qoldanylǵan sporttyq oıyndar - «II-fýtbol», «Air Sadaq» vırtýaldy sadaq atýy jáne «Asyq atý» oıynynyń sıfrlyq nusqasy elorda turǵyndary men qonaqtarynyń erekshe qyzyǵýshylyǵyn týdyrdy. Budan bólek, qatysýshylar dástúrli asyq atý, sadaq atý, gir kóterý, arqan tartý, láńgi tebý jáne qazaqsha kúres boıynsha da ózara baq synasty. Bul jarystarǵa elordanyń ataqty chempıondary da qatysty.
Astanada Naýryz meıramy aýqymdy deńgeıde toılanyp jatyr
Kóktemniń ásem kóńil kúıin kitap, qyzǵaldaq jáne qazaqstandyq dızaınerlerdiń kıim kórmeleri, otandyq óndirýshiler men qala qolónershileriniń jármeńkesi, sondaı-aq konserttik baǵdarlama aıryqsha ásermen tolyqtyrdy.
Aıta keteıik, merekelik «Etnoaýyl» 21-23 naýryz aralyǵynda elorda turǵyndary men qonaqtary úshin ashyq bolady.
Yntymaq kúni: Qazaqstanda Naýryznama onkúndiginiń segizinshi kúni toılanyp jatyr