О́ńir Naýryz merekesin aıshyqty ádemi naqyshpen, tárbıeli taǵylymmen rýhanı mol qazynany qaıta jańǵyrtyp, marjanyn súzip alyp atap ótti. Sonyń ishinde el nazaryn aýdarǵan eleýlisiniń biri – «Kókshetaý Energo» jaýapkershiligi shekteýli seriktestigi uıymdastyrǵan zııatkerlik tanymdyq oıyny.
Sońǵy túıin – «Oı zerek» kvız oıyny. Baıqaý barysynda qatysýshylardyń logıkalyq oılaý qabileti, aıaq astynan tapqyrlyq tanytýy, ázil-qaljyńǵa ıkemdiligi, tutastaı alǵanda komandalyq rýhty nyǵaıtý tarazy basyna tartyldy. Oıynǵa ortalyq bazanyń jeti komandasy qatysty. Ár komanda tórt qatysýshydan turatyn. Ilkimdi is-shara taza qazaq tilinde ótkizildi.
Qatysýshylar tilderi jetkenshe óz komandalaryn jan-jaqty qyrlarynan tanystyryp, tildi meńgerýge degen yqylas umtylystaryn kórsete bildi. Ushqyr oıdyń ushqynyn laýlatatyn «Oı qyzdyrý» saıysynda qatysýshylar oılaý júıesiniń durystyǵy men jyldam pikir qorytý deńgeılerin tanytty. «BRAIN MIX» taqtasynda bilim deńgeıi men logıkalyq oılaý qabileti sarapqa salynsa, «Oılan, tap, aýdar» arenasynda jergilikti ult tilin qanshalyqty meńgergendigin kórsetti, al, «Dástúr alańy» ulttyq dástúrler týraly tanym men túsinikti bezbendedi.
– Búgingi is-sharanyń negizgi maqsaty ana tilimizdi, salt-dástúrimizdi nasıhattaý, – deıdi seriktestik basshysy Dosymhan Aralbaev, – ózge ult ókilderiniń memlekettik tildi meńgerýine barlyq jaǵdaıdy jasap jatyrmyz. Yntalandyrý maqsatynda beriletin syıaqy qory da mol. Eńbek etip jatqan adamdardyń bári bir úıdiń balalaryndaı memlekettik tilde sóılep, jergilikti ulttyń ádet-ǵurpyn tanyp biletin bolsa, qurmeti de artady. Saıyp kelgende bul birlikti bekemdeı túspek.
Ár komanda memlekettik tildi qanshalyqty meńgergenin, shyǵarmashylyq qýatyn jáne birligin ańǵarta bildi. Baıqaý qorytyndysy boıynsha bas júldege «Bilimge qushtarlar» komandasy laıyq dep uıǵarylyp, tórt mıllıon teńge, birinshi orynǵa «Naýryzkóje» komandasy kóterilip, úsh mıllıon teńgege ıe boldy. Ekinshi orynǵa laıyq dep eseptelgen «Shamshyraq» komandasyna eki mıllıon, úshinshi oryndy enshilegen «Otandastar» komandasy bir mıllıon teńge syıaqyǵa ıe boldy. Erekshe kózge túsken bes oıynshyǵa árbir atalymdar boıynsha syı-sııapat tabystaldy.
Aq túıeniń qarny jarylǵan áz Naýryz merekesinde seriktestiktiń aýdandaǵy bólimshelerine alty arnaýly tehnıka men jeńil avtokólikter tabys etildi.
Kókshetaý