Aqtóbe oblysy bıyl sý tasqyny qaýpi ortasha deńgeıdegi óńirdiń qataryna endi. Oǵan qysta túsken qardyń azdyǵy, jerdegi tońnyń juqalyǵy syndy birneshe sebep bar.
Degenmen tabıǵattyń tosyn minezin aldyn ala boljaý múmkin emes. Onyń ústine aldyńǵy jyldardaǵy tasqynnyń keltirgen zardabyn jurt umytqan joq. Bıyl jergilikti bıýdjetten bólingen 639 mln teńge ózen jaǵalaýlaryn bekitýge, sý ótkelderin qoqys pen qýraǵan aǵash-qamystan tazartýǵa, ınertti materıaldar men janar-jaǵarmaı satyp alýǵa, qala kóshelerinde jınalǵan qar sýyn shyǵarýǵa jumsalyp jatyr. Qazir qala kósheleri men turǵyn úı alaptarynda jınalǵan erigen qar sýyn sorýǵa 120 assenızator kóligi, eki jyljymaly sorǵylaý beketi, motopompalar, basqa da arnaıy tehnıkalar jumyldyrylyp, 10 myń tekshe metr ınertti materıal, 15 myń dana qap daıyndaldy. Qala kóshelerindegi aryqtar men sýaǵarlar qar men muzdan tazartyldy. Aqtóbedegi sý jınalatyn aryqtardy burý júıesi retke keltirildi. Júıeniń jalpy uzyndyǵy – 61,6 shaqyrym, onyń ishinde 55 shaqyrymy – ashyq aryqtar, 6,6 shaqyrymy – jabyq jeliler. Búginde 45 drenajdy-jınaqtaý qudyǵy men bes sorǵylaý beketi jumysqa daıyn.
Qala shetindegi Elek, Sazdy ózenderinde muz jarý jumystary júrgizildi. Jylda kóktemde qala shetindegi turǵyn úı alaptaryna qaýip tóndiretin Peschanka ózeniniń 800 metr arnasy qamystar men qýraǵan aǵashtardan tazartylyp, jaǵalaýy bekitildi. Oblystyq tótenshe jaǵdaı departamentiniń mamandary avtokólik joldaryndaǵy sý ótkizý ótkelderi men kópirlerdiń aınalasyn tazartyp, sý jolyna kedergi keltiretin joldardy arshydy. Oıyl, Yrǵyz ózenderiniń seń júretin bólikterinde muz jarý jumystary júrgizildi. Bul – dalalyq ózenderdiń arnasynan shyǵyp, jaǵalaýdaǵy eldi mekender men kólik joldaryn basyp qalmas úshin jasalǵan sharalar.
«Qazsýshar» RMK Aqtóbe oblystyq fılıalynyń dırektory Rınat Sháýenovtiń aıtýynsha, Qarǵaly, Aqtóbe, Sazdy sýqoımalary tasqyn sýdy qabyldaýǵa daıyn. Qarǵaly sýqoımasy 193 mln tekshe metr, Aqtóbe sýqoımasy 143 mln tekshe metr, Sazdy 4,6 mln tekshe metr sý qabyldaı alady. Eger sý deńgeıi tez kóterilip, qoımalar tolyp bara jatsa, Qarǵaly, Elek, Sazdy ózenderine jiberýge bolady. Qazir osy strategııalyq nysandarda táýlik boıy kezekshilik uıymdastyrylǵan.
Aqtóbe oblysynda dalalyq ózender sáýirdiń basynda tasıdy. «Qazgıdromet» RMK fılıalynyń habarlaýynsha, kún kúrt jylynǵanda Aqtóbe sýqoımasyna 110 mln tekshe metr, Qarǵalyǵa 72 mln tekshe metr sý jınalýy múmkin. Sazdy sýqoımasy negizinen erigen qar sýymen tolyǵatyn bolǵandyqtan, mamandar jınalǵan sýdy birtindep Sazdy ózenine jiberip otyrýdy josparlaǵan. Degenmen byltyrǵy jyldarǵa qaraǵanda, óńirde sý tasqyny qaýpi asa joǵary emes ári keletin sý mólsheri de az degen boljam bar.
Aqtóbe oblysy