Abaı oblysynyń Aqsýat, Aıagóz, Besqaraǵaı, Borodýlıha, Jarma, Kókpekti aýdandary sý tasqyny qaýpi bar aımaqtar qatarynda. Oblys ákimi Berik Ýálıdiń Aıagózge jumys sapary barysynda aldymen sý basý qaýpi bar jerlerdiń daıyndyǵy pysyqtaldy. Máselen, Aıagóz qalasyndaǵy «Qýanysh» shaǵyn aýdanyndaǵy kóshelerdiń birinde jerasty sýynyń kóterilýi baıqalǵan. Osyǵan oraı aımaq basshysy turǵyndardyń qaýipsizdigin birinshi orynǵa qoıýdy, sý jınalýynyń aldyn alý is-sharalaryn kúsheıtýdi tapsyrdy.
Aýdan ákiminiń mindetin atqarýshy Aıbek Nuǵymarovtyń aıtýynsha, qaladaǵy aldyn alý sharalary birneshe baǵytta qatar júrip jatyr.
«Búginge deıin qala kóshelerinen 32 myń tekshe metr qar arnaıy belgilengen oryndarǵa shyǵaryldy. Sondaı-aq 8,8 km jabdyqtalǵan sýaǵar aryqtar, 12 km jabdyqtalmaǵan aryqtar, 85 sý ótkizgish qubyr tazartylǵan. Qajet bolǵan jaǵdaıda qosymsha kúshterdi tartý qarastyrylǵan. «Aıagóz-sý» memlekettik kommýnaldyq kásipornynyń 6 sý sorý tehnıkasy, temirjol mekemesiniń 3 tehnıkasy, №13 órt sóndirý bóliminiń tehnıkasy daıyn. Sonymen qatar tótenshe jaǵdaılar bóliminde 5 tonna dızel otyny men 3 tonna AI-92 benzın qory ázirlengen», dedi ol.
Aıagózdegi ahýalǵa qaraǵanda, munda másele kóbine-kóp qala ishindegi osal núktelerdi der kezinde baqylaýǵa alyp, ınjenerlik júıeni úzdiksiz kútip ustaýǵa tirelip tur. Al Aqsýattaǵy kórinis sál basqa. Munda daıyndyq bir ǵana eldi mekenniń nemese bir ǵana kósheniń aınalasynda emes, tutas aýdan aýqymynda júıelengen. Aýdan ákimdiginiń 2026 jylǵy 19 qańtardaǵy qaýlysyna sáıkes «2026 jylǵy sý tasqyny kezeńine arnalǵan is-sharalar» jospary bekitilip, arnaıy komıssııa jasaqtalǵan. Kóktemgi tasqyn kezinde aýdan kóleminde 45 birlik tehnıka men qural-jabdyq, 67 qyzmetker jumyldyrylady. Tótenshe jaǵdaılar bóliminde arnaıy tehnıka men sý sorý quraldary daıyndalǵan. Buǵan qosa aýdan ákimi apparaty 15 motopompa ázirlep qoıǵan. Injenerlik, aýyr tehnıka da jetkilikti deńgeıde toptastyrylǵan. «Aqsýat» kommýnaldyq kásiporny birneshe aýyr júk kóligi, júk artýshy, avtogreıder men ekskavatordy saqadaı saı ustap otyr. «QazAvtoJol» tarapynan qosymsha tehnıka jumyldyrylmaqshy. Búginge deıin 7 285 tekshe metr qar shyǵarylǵan. Sý basý qaýpi bar eldi mekenderde aldyn ala bógetter de jasalǵan.
«Kóktemgi kezeńge daıyndyq birneshe aı buryn bastaldy. Qaýipti aýyldarda qorǵanys bógetteri salyndy, tehnıka men materıaldyq qor daıyndaldy. Qazir jaǵdaı turaqty, aldyn alý sharalary baqylaýda», deıdi aýdan ákimdiginiń mamandary.
Aqsýat aýdanynda jol men kópirdiń ahýalyna da nazar aýdarylǵan. Respýblıkalyq mańyzy bar 148 km joldaǵy 3 kópir men 124 sý ótkizgish qubyrdyń 78-i, sondaı-aq aýdandyq mańyzy bar 460 km joldaǵy 9 kópir men 66 sý ótkizgish qubyr tolyq tazartylyp, jumys tolyq aıaqtalǵan.
Semeı mańyndaǵy Ertis, Aıagóz tóńiregindegi ózen arnalary, Jarmadaǵy Shar sýqoımasy, Borodýlıha aýdanyndaǵy Krasnyı-Iаr eldi mekeni – bári-bári baqylaýǵa alynǵan. Daıyndyq jumystary tııanaqty júrip jatyr. Degenmen aýa temperatýrasy kúrt kóterilip, qar qarqyndy erigen jaǵdaıda keıbir jerlerde jaǵdaı kúrdelenýi múmkin. Sondyqtan ózen arnalary men sý ótkizý qurylystaryn ýaqtyly tazalaý, tehnıka men apattyq brıgadalardyń daıyn bolýyna erekshe nazar aýdarý qajet.
Resmı derekke súıensek, oblysta sý tasqyny qaýpi bar 64 eldi meken anyqtalǵan. Onyń ishinde 3 aýylda qaýip tolyq joıylǵan, 22 eldi mekende qaýip deńgeıi tómendegen, 39 eldi mekende qater áli saqtalyp tur. О́ńirde 42 shaqyrymǵa jýyq qorǵanys dambalary salynyp, nyǵaıtylǵan, ózen arnalary tazartylyp, drenaj júıeleri retke keltirilgen. Qazir azamattyq qorǵaý júıesiniń 1 436 qyzmetkeri men 543 tehnıkasy joǵary daıyndyq rejimine kóshirilgen. Evakýasııalyq pýnktterdiń ázirligi tekserilip, qaýipti aýmaqtarda táýlik boıy baqylaý júrgizilip otyr.
Abaı oblysy