Sý aıdyndarynyń barlyǵy muz qursanyp jatqanyna qaramastan Ertis - Baıan óńirine aqqýlar ushyp kele bastady. Alǵashqylary Aqsý aýyldyq aımaǵynan kózge túsken.
Halqymyzdyń uǵymynda qustyń tóresi dep esepteletin aqqýlar Pavlodar jerindegi aıdyndardy tóńirektep júr. Qazir oblys aýmaǵyndaǵy ózen-kólderdiń barlyǵynda kók muz siresip tur. Sondyqtan qanattylar erigen qar sýyn jaǵalap qonyp jatyr.
Oblystyq orman jáne janýarlar dúnıesin qorǵaý mekemesiniń basshysy Ajdar Júsipovtiń dereginshe, kelip jatqan qustar suńqyldaq jáne qıqyldaq aqqý túrlerine jatady.
– Aqsý aýyldyq aımaǵy men Pavlodar aýdany dalasyndaǵy erigen qar sýyna aqqýlar oraldy. Qaýyrsyn qanattylardy bizdiń mekemeniń ınspektorlary baıqaǵan. Bul kúnniń kúrt jylynatynyn bildiredi. Olardyń ishindegi suńqyldaq aqqýlar elimizde keń taraǵan, kóbine respýblıkamyzdyń soltústik, ortalyq jáne ońtústik-shyǵys óńirleriniń qalyń qamysty-qoǵaly iri kólderin mekendeıdi. Qyzyl kitapqa engen qıqyldaq aqqý da bizdiń aımaqta kezdesedi, – deıdi mekeme basshysy.
Ornıtologterdiń aıtýynsha, sybyrlaq aqqýdyń (Cygnus olor) turqy irileý, salmaǵy 14 kıloǵa deıin bolady. Túsi aq, tumsyǵy – qyzyl, onyń ústinde qara shor baıqalady. Jas qustar qońyr-sur tústi. Júzgende moınyn latynnyń S árpi túrinde ıip ustaıdy. Ushyp bara jatqanda alystan qanattarynyń yrǵaqty sýsyldaǵan dybysy estiledi. Osy ereksheligi arqyly suńqyldaq aqqýdan erekshelenedi ári sońǵysynyń tumsyǵy sary-qara, shor bolmaıdy. Elimizdiń barlyq sýqoımalarynda kezdesedi.
Pavlodar oblysy