Almaty qalasyndaǵy Ulttyq ulan 5571 áskerı bóliminiń merzimdi áskerı qyzmetshisi Ázız Temirbek jaýyngerlik mindetin abyroımen oryndaýmen qatar, áskerıler arasynda ulttyq ónerdi nasıhattap júr.
Qyzylorda oblysynyń Syrdarııa aýdanynda dúnıege kelgen Ázız dombyraǵa bala kúninen áýes bolyp ósken. Mektepte alǵashqy ustazy Gúlnaz Seralıevadan kúı óneriniń álippesin úırenip, keıin Qyzylorda qalasyndaǵy Qazanǵap atyndaǵy mýzykalyq joǵary kolledjde bilim alyp, ustazy Jansultan Jumabekten kúıshilik sheberligin shyńdaǵan. Osy jyldarda ol júzge jýyq kúı úırenip, «Saryarqa», «Serper», «Aqsaq kıik», «Tóremurat», «Baıjuma» sııaqty áıgili kúılerdiń basym bóligin nota arqyly meńgergen.
Ázız áskerı bólimniń quramynda Almaty qalasynyń qaýipsizdigin kúzetip, bos ýaqytynda qarýlastarynyń ótinishimen kúı tartady.
– Dombyrada kúı oryndaý maǵan halqymyzdyń mádenıetin, salt-dástúrin nasıhattaý jaýapkershiligin júkteıdi. Syr kúı mektebi ókilderiniń izin jalǵap júrgendigimdi maqtan etemin, – deıdi Ázız.
Ol dombyranyń qońyr únimen qasıetti ónerdi dáriptep, ǵasyrlardan jetken kúı dástúrin jańa býynǵa jetkizip keledi. Onyń oryndaýyndaǵy áserli kúıler sarbazdardyń kóńil kúıin kóterip, jaýyngerlik rýhyn arttyra túsedi.
ALMATY