«Qazaqstan» RTRK Gennadıı Golovkınniń jaqyn arada ótetin eki jekpe-jegin tikeleı efırden kórsetý quqyǵyna ıe boldy.
Qazaqstandyq kásipqoı boksshynyń amerıkalyq kishi Vıllı Monromen kezdesýin «Qazaqstan» telearnasy tikeleı efırden mamyr aıynyń ortasynda kórsetedi. 17 mamyr kúni tańerteń atalǵan telearna bıylǵy jylǵy basty boks aıqastarynyń biri – orta salmaqtaǵy WBA jáne IBO tujyrymy boıynsha álem chempıony Gennadıı Golovkın men orta salmaqta «Boxcino-2014» týrnıriniń jeńimpazy 28 jastaǵy kishi Vıllı Monromen jekpe-jegin Los-Andjeles qalasynan tikeleı efırde usynady. 17 myń adam sııatyn Los-Andjelestiń (AQSh) jańartylǵan «The Forum» arenasynan úlken boks keshi 17 mamyrda saǵat 07.00-de «Qazaqstan» telearnasynan kórsetiledi. Al Golovkın men kishi Monronyń kezdesýin shamamen tańǵy 09.00-de tamashalaýǵa bolady. Eskerte ketetin nárse, tikeleı efırden berilgen jekpe-jekti jiberip alǵan jankúıerler translıasııalardyń qaıtalaýyn 17 mamyr kúni kúndizgi jáne 18 mamyr kúni keshki ýaqytta «Kazsport» telearnasynan kóre alady. G.Golovkın – Qaraǵandy qalasynyń týmasy, qazaqstandyq boksshy, 2003 jyly áýesqoıshylar arasynda álem chempıony jáne 2004 jyly Olımpıada oıyndarynyń kúmis júldegeri. Qazaqstan Respýblıkasynyń eńbek sińirgen sport sheberi, elimizdiń 7 dúrkin chempıony, halyqaralyq týrnırlerdiń jeńimpazy. 2013 jyly 24 sáýirde Qazaqstan halqy Assambleıasynyń XX sessııasynda boksshy óziniń shyǵý tegi týraly: «Ultym týraly suraǵan kezde, men bylaı dep jaýap beremin: Ákem – orys, sheshem – káris, al men – qazaqpyn! Meniń barlyq jeńisim elime arnalady, meniń halqyma, Prezıdentime arnalady!» degen bolatyn. Golovkınniń ekinshi jekpe-jegi, boljam boıynsha, qyrkúıek aıyna josparlanyp otyr. Naqty kúni, ótkiziletin orny men qarsylasynyń esimi áli belgisiz.
Dastan KENJALIN, «Egemen Qazaqstan».