Premer-mınıstr Oljas Bektenov Halyqaralyq Araldy qutqarý qorynyń(HAQQ) basqarma múshelerimen kezdesý ótkizdi. Sondaı-aq elimiz atalǵan qorǵa tóraǵalyq etýin bıyl aıaqtaıdy.
Jıynǵa Tájikstan Respýblıkasy Premer-mınıstriniń orynbasary Sýlaımon Zııozoda, Túrikmenstan Mınıstrler kabıneti tóraǵasynyń orynbasary Tangrygýly Atahallyev, О́zbekstan Prezıdentiniń keńesshisi Shýhrat Ganıev, Sý sharýashylyǵy mınıstri Shavkat Hamraev, Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstriniń orynbasary – Mınıstrlik janyndaǵy Sý resýrstary qyzmetiniń dırektory Almaz Jeenalıev, Halyqaralyq Araldy qutqarý qory atqarýshy komıtetiniń tóraǵasy Ashat Orazbaı, sondaı-aq elimizdiń salalyq mınıstrlikteri men vedomstvo basshylary qatysty.
Sý sharýashylyǵy salasyndaǵy óńirlik yntymaqtastyqty ári qaraı damytý, Qor qyzmetiniń tıimdiligin arttyrý, sondaı-aq bıylǵy 22 sáýirde Astanada ótetin HAQQ-ǵa múshe memleketter basshylary keńesiniń otyrysyna daıyndyq máseleleri qaraldy.
Oljas Bektenov Ulttyq quryltaıdyń V otyrysynda Memleket basshysy Qasym-Jomart Toqaev aıqyndaǵan Araldy qutqarý jáne transshekaralyq sý resýrstaryn turaqty basqarý máseleleri basym baǵyttar qatarynda ekenin atap ótti. HAQQ otyz jyldan astam ýaqyt boıy Ortalyq Azııa memleketteriniń sý, ekologııalyq jáne áleýmettik-ekonomıkalyq salalardaǵy ózara árekettesýiniń negizgi óńirlik alańy bolyp otyrǵany basa aıtyldy.
«Munda Syrdarııa jáne Ámýdarııa ózenderi basseınderinde sý resýrstaryn esepke alý, monıtorıng júrgizý men bólýde biryńǵaı avtomattandyrylǵan júıeni kezeń-kezeńimen engizý týraly sóz bolyp otyr. Sıfrlandyrý men esepke alý sý paıdalanýdyń ashyqtyǵyn qamtamasyz etedi dep oılaımyn. Senimdi derekterdiń bolýy men birlesken monıtorıng memleketter arasyndaǵy senimniń negizi ári sý resýrstaryn basqarýdyń tıimdiligin arttyrýǵa múmkindik beredi», dedi O.Bektenov.
Qazirgi zamanǵy sharttyq-quqyqtyq bazany qalyptastyrý aıasynda elimiz Ortalyq Azııanyń sý resýrstaryn paıdalaný jónindegi Negizdemelik konvensııasyn pysyqtaýdy qoldaıdy. Qujat sý resýrstaryn utymdy paıdalaný, transshekaralyq zııannyń aldyn alý ári gıdrologııalyq aqparat almasýdy damytýdaǵy kelisilgen qaǵıdattardy bekitýge tıis.
Prezıdent Qasym-Jomart Toqaev jahandyq sý máselelerin sheshý úshin Birikken Ulttar Uıymy aıasynda Halyqaralyq sý uıymyn qurýdy usyndy. Bul bastama kúsh-jigerdi biriktirýge jáne qosymsha resýrstardy tartýǵa, sonyń ishinde óńirlik jobalardy júzege asyrýǵa múmkindik beredi.
Kezdesý barysynda Qor jumysynyń tıimdiligin arttyrý, onyń ınstıtýttary arasyndaǵy úılestirýdi kúsheıtý maqsatynda Halyqaralyq Araldy qutqarý qorynyń uıymdastyrýshylyq qurylymyn jáne sharttyq-quqyqtyq bazasyn jetildirý máselelerine erekshe nazar aýdaryldy. Sondaı-aq aldaǵy Halyqaralyq Araldy qutqarý qorynyń quryltaıshy memleketteri basshylary keńesiniń otyrysy qarsańynda negizgi máselelerde kelisilgen tásilderdi ázirleýdiń mańyzdylyǵy atap ótildi.
Kezdesý qorytyndysy boıynsha taraptar syndarly dıalogti jalǵastyrýǵa, sý dıplomatııasyn damytýǵa jáne óńirdiń sý resýrstaryn turaqty basqarýǵa, sondaı-aq Aral teńizi basseınindegi ekologııalyq ahýaldy jaqsartýǵa baǵyttalǵan ortaq sheshimderdi birlesip izdeýge múddeli ekenin rastady.