Ýaqytsha shekteýler aıaqtalǵannan keıin Úkimet teńgerimdi tarıf saıasatyn júıeli túrde jalǵastyrýǵa nıetti. Negizgi ustanym – halyqqa túsetin júktemeni múmkindiginshe jeńildetip, qyzmet sapasyn arttyrý.
Tarıfterdi ózgertý barysynda ekonomıkalyq negizi joq sheshimderge jol berilmeıdi. Árbir qadam naqty esepke, naryqtaǵy ahýalǵa súıenip qabyldanady. Bul óz kezeginde ınflıasııalyq qysymdy tejep, turǵyndardyń áleýmettik jaǵdaıyna keri áserdi barynsha azaıtpaq.
Tarıf saıasatynyń túpki maqsaty – halyqtyń turmys sapasyn jaqsartý. Osy baǵytta ınfraqurylymnyń tozýyna jol bermeı, jóndeý jumystaryn ýaqytyly júrgizý, apattardyń aldyn alý basty nazarda ustalady. Demek tarıf tek baǵa quraly emes, kommýnaldyq júıelerdiń sapasyna jaýap beretin ekonomıkalyq tetikke aınalmaq.
Energetıka mınıstrliginiń málimetine sáıkes, bıyl 1 sáýirden bastap elektr energııasyna arnalǵan shekti tarıfter ózgerissiz qalady. Olar byltyrǵy deńgeıde saqtalyp otyr. Aıta keteıik, 2025 jylǵy jeltoqsanda 2026– 2032 jyldarǵa arnalǵan shekti tarıfter bekitilip, olardyń turaqtylyǵy aldyn ala qarastyrylǵan.
Sonymen qatar janar-jaǵarmaı baǵasy naryq qaǵıdattaryna saı qalyptasady. Degenmen Úkimet bul saladaǵy baqylaýdy bosańsytpaı, baǵanyń kúrt ári negizsiz ósýine jol bermeýdi kózdeıdi. El ishinde janar-jaǵarmaı tapshylyǵy tirkelgen joq, qajetti qor jetkilikti kólemde jasaqtalǵan.
О́ńirlerde jergilikti atqarýshy organdar, salalyq vedomstvolar jáne naryq qatysýshylary birlese otyryp jedel monıtorıng júrgizip jatyr. Arnaıy shtabtar kún saıyn baǵa deńgeıin, janar-jaǵarmaıdyń qoljetimdiligi men jetkizý tizbegin baqylaýda ustap otyr. Bul sharalar ishki naryqtaǵy turaqtylyqty saqtap, kez kelgen aýytqýǵa der kezinde áreket etýge múmkindik beredi.