Túrkistan oblysynda kólik jýatyn orynda bolǵan janjal qaıǵyly oqıǵaǵa ulasyp, adam ólimimen aıaqtaldy. Sot eki aıyptalýshyny da kináli dep tanyp, olarǵa uzaq merzimdi jaza kesti, dep habarlaıdy Egemen.kz.
Is Túrkistan oblysy boıynsha qylmystyq ister jónindegi mamandandyrylǵan aýdanaralyq sotta qaraldy. Aıyptalýshylarǵa top bolyp, buzaqylyq nıetpen adam óltirý jáne adam óltirýge oqtalý baptary boıynsha aıyp taǵylǵan.
Sot materıaldaryna sáıkes, 2025 jylǵy 29 qazanda Tólebı aýdanynyń Zagambar aýylyndaǵy kólik jýatyn oryn aýmaǵynda aıyptalýshy O. qoǵamdyq orynda, bolmashy sebeppen jábirlenýshi S.-ny soqqyǵa jyqqan. Keıin ol oqıǵa ornyna kelgen A. men M.-ǵa pyshaq qoldanǵan.
Áıelin sýǵa batyryp óltirgen Pavlodar turǵyny 15 jylǵa sottaldy
Aýyr jaraqat alǵan Maǵjan Bımyrza oqıǵa ornynda qaza tapty. Al shabýyl jasaýshy onyń 22 jastaǵy baýyryna da birneshe ret pyshaq suǵyp, oqıǵa ornynan boı tasalaǵan.
Ekinshi aıyptalýshy shabýyldy toqtatpaǵany úshin, sottyń anyqtaýynsha, qylmysqa sybaılas retinde tanyldy.
Prokýror aıyptalýshylarǵa 15 jyldan astam merzimge bas bostandyǵynan aıyrý jazasyn suraǵan. Jábirlenýshi tarap sottan eń qatań jazany taǵaıyndaýdy talap etti.
Sot barysynda aıyptalýshy O. óz kinásin ishinara moıyndap, jazany jeńildetýdi surady. Al aıyptalýshy K. tek buzaqylyq epızodyn moıyndap, qalǵan aıyptar boıynsha aqtaýdy ótindi.
Sot sheshimi boıynsha bir aıyptalýshyǵa 20 jyl, ekinshisine 15 jyl bas bostandyǵynan aıyrý jazasy taǵaıyndaldy. Sonymen qatar, sot olardan qaza tapqan azamattyń otbasyna 25 mıllıon teńge moraldyq ótemaqy óndirdi.
«Aqtóbe – Almaty» poıyzyndaǵy kisi ólimi: Kúdikti toǵyz jylǵa sottaldy
Úkim ázirge zańdy kúshine engen joq jáne apellıasııaǵa berilýi múmkin.
Aıta keteıik, oqıǵadan keıin kúdiktiler jedel ustalyp, tergeý barysynda ýaqytsha ustaý ızolıatorynda qamaýda bolǵan.