Keshe «Múgedek jastar qoǵamy» birlestiginiń uıymdastyrýymen «Pingwin Friends» ǵımaratynda boýlıngten «Naýryz-2026» týrnıri ótti. Oǵan múgedektigi bar adamdardyń 3 qoǵamdyq uıymy qatysty. (Qalada jalpy 7 komanda bar). Naýryz merekesi aıasynda ótken atalǵan jarys sporttyń jańa túrin damytýdy kózdeıdi, dep jazady Egemen.kz.
Astana qalalyq «Múgedek jastar qoǵamy» birlestigi 21 jyldan astam jumys istep keledi. Atalǵan qoǵamdyq birlestik osyndaı is-sharalardy Astana qalasy ákimdiginiń, atap aıtqanda, Dene shynyqtyrý jáne sport basqarmasy men Sporttyq-buqaralyq is-sharalardy ótkizý dıreksııasynyń qoldaýynyń jáne kásipkerler men bıznes ókilderiniń qoldaýymen joǵary deńgeıde ótkizip júr.
Jarys qorytyndysy boıynsha birinshi oryndy «Chývstvýıa jızn» balalar ortalyǵy jeńip alsa, ekinshi oryndy TIFLOSMART ıelendi, al úshinshi oryndy «Múgedek jastar qoǵamy» birlestigi enshiledi. (Týrnırdiń bas demeýshisi «Kartchek OPT» JShS). Komandalar dıplomdarmen jáne medaldarmen marapattaldy.
Al komanda quramyndaǵy árbir qatysýshyǵa shaǵyn syılyqtar tabystaldy.
«Chývstvýıa jızn» balalar ortalyǵy atynan týrnırge qatysýshy 30 jastaǵy Dalıda Hasan óz áserin bólisti.
«Men birinshi toptaǵy múgedekpin. Buǵan deıin atletıkamen aınalysyp júrgenmin. Qazir boýlıngti qatar alyp júrmin. Boýlıngke 2 jyldan beri qyzyǵyp, aı saıyn ótetin boýlıng jarystarynan qalmaýǵa tyrysamyn. Bastapqy ýaqytta durys oınaı almaıtyn edim, qazir áldeqaıda jaqsy oınaımyn. Bul sport túri adamnyń bulshyq etin damytýǵa kómektesedi ári ýaqytym óte qyzyqty ótedi», dedi ol.
Dalıda Dilmuratqyzynyń pikirinshe, múmkindigi shekteýli jandar úıde otyryp qalmaýy kerek.
«Múgedek bolyp qalǵan bastapqy kezde úıden múlde shyqpaıtynmyn. Osyndaı qoǵamdarǵa kelip, oıyndarǵa qatysyp, ózimdi ashyp, basqa adamdardy tanı bastadym. Jarys barysynda adamdar bir-birimen tanysady, jetistikterine qýanady, bir-birine demeý bolady. Sondyqtan múmkindigi shekteýli jandarǵa qoǵamnan qalmaı, osyndaı oıyndarǵa qatysyp júrýge keńes beremin. Meniń ómirlik ustanymym − eshqashan eńseni túsirmeı, árdaıym jaqsylyqqa umtylý. Osy rette boýlıngpen aınalysý maǵan óte jaqsy áser etkenin aıta ketkim keledi», deıdi D. Hasan.
Aqmola oblysynda múmkindigi shekteýli jandardyń jalaqysynan zańsyz salyq ustalǵan
Astana qalalyq «Múgedek jastar qoǵamy» birlestiginiń tóraǵasy Murat Ábdimomynov atap ótkendeı, múgedekter ortasynda boýlıngtik týrnırler ótkizýdegi maqsat – jastar men balalardy osy sport túrine kóbirek tartý.
«Boýlıng týrnırlerimiz buryn aı saıyn «Dýman» ortalyǵynda ótetin. Al, bul jerde búgin alǵash ret ótkizip otyrmyz. Boýlıng sporty bizge óte qyzyq. Bul týrnırdi ótkizý ıdeıasy 10 jyl buryn paıda boldy. Sebebi, basqa sport túrlerinen federasııalar bar, al boýlıngten mundaı federasııa joqtyń qasy. Sondyqtan boýlıngten týrnırler ótkizý jańa sport túrin damytý maqsatynda bastaldy. Federasııa ashylsa, biz Astanada ǵana emes, Kókshetaýda, Pavlodarda, Shymkentte, Tarazda, bir sózben aıtqanda, boýlıng týrnırlerin búkil Qazaqstanda ótkizgimiz keledi», deıdi Murat О́serbaıuly.
Oralda múmkindigi shekteýli jandarǵa arnalǵan zamanaýı sport kesheni ashyldy
M. Ábdimomynovtyń aıtýynsha, bıyl «Múgedek jastar qoǵamy» birlestigi boýlıngten túrli formatta týrnırler ótkizýdi josparlap otyr. Alǵashqy kezeńder Astana qalasynyń múmkindigi shekteýli azamattary arasynda ótse, keıingi jarystar ınklıýzıvti formatta uıymdastyrylady.
«Inklıýzıvti týrnırlerde ártúrli adamdar birge oınaıdy. Keıde kózdi jaýyp oınaýǵa bolady. Bul erekshe tájirıbe adamnyń sezimin damytady (Kózi kóretin adamdar zaǵıp jandardy sezinedi). Negizgi maqsat − adamdarǵa múmkindikterin ashýǵa kómektesý, sport arqyly densaýlyq pen rýhty kóterý, qoǵamda teń múmkindik jasaý.
Entýzıazmdy damytý arqyly adamdar múgedektigi bar jandarǵa nemquraıdy qaramaı, barynsha túsinýge umtylady. Boýlıng – sport túri ǵana emes, bul – adamdardy biriktiretin, qoǵamdy damytatyn qural», dep túıindedi «Múgedek jastar qoǵamy» birlestiginiń tóraǵasy Murat Ábdimomynov.
Múmkindigi shekteýli balalarǵa – erekshe nazar