ASTANA. 26 aqpan. Keshe túnde Chempıondar lıgasynyń 1/8 fınaldyq kezdesýleriniń birinshi oıyndary tolyq aıaqtaldy. Bul týraly Football.ua habarlady.
Anglııanyń Londonynda «Arsenal» Fransııanyń «Monakosyn», Germanııanyń Leverkýzeninde «Baıer» ıspannyń «Atletıkosyn» qabyldady. Bulardyń birinshisinde aǵylshyndar 1:3 bolyp jeńilse, ekinshisinde nemister 1:0 esebimen jeńiske jetti.
Kútpegen nátıje aǵylshyn astanasynda tirkeldi. Matchtyń basynda alań ıeleri qarsylastaryna des bere qoımaıtyndaı bolyp kóringen. Arsen Vengerdiń jigitteri áni-mine degenshe esep ashyp ketetindeı de bolyp turdy. Olar alǵashqy 15 mınýt boıyna qarsy jaqtyń qaqpa betine qaraı dopty dúńkildetip urýmen boldy. Sodan keıin bul jaqtyń tetiginen bir jip úzilip ketkendeı iser etti. Endi «Monako» shabýylǵa shyǵýǵa kóshti. Biraq qaýip tónetindeı eshteńe bola qoıǵan joq. Osylaısha birinshi taımnyń túgesiler shaǵy jaqyndap kele jatty. Kenet oń qaptaldan qaýyrt jasalǵan shabýyldan soń eki qadamdy júristen keıin qonaqtar esep ashty da ketti. 38-mınýtta qaqpashy alańyna kireberistegi ortadan Kondogbııanyń urǵan doby aldyndaǵy qorǵaýshyǵa tıip, baǵytyn sál ózgertti de, torǵa baryp gúmp etti. Gol!
Alań ıeler ekinshi taımnyń basynda sosyn jappaı alǵa umtylýǵa májbúr boldy. Bir Jırýdyń ózi birneshe ret dál soqqy jasaı almaı, san soqty. Osylaı qorǵanys shebin umytyp ketken aǵylshyndar taǵy da sodan opyq jedi. Bul joly quıyndaı quıǵytqan qarsy shabýyldyń shyrǵasynda Martıal men Berbatov qarsy qaqpa aldyna ádemi keldi. Bulardyń birinshisi eiknshisin sheshýshi soqqyǵa jiberdi, al bolgar forvardy ony múlt jibergen joq. Sóıtip, 53-mınýtta esep 2:0-ge jetti.
Komandalar osy eseppen oıynnyń sońyna deıin bardy. Negizgi ýaqytqa qosylǵan birinshi mınýtta aqyry aǵylshyndar Chemberlenniń goly arqyly esepti qysqartty. Biraq arada 3 mınýt ótkende qonaqtar taǵy da esep aıyrymyn eki dopqa jetkizdi (Karrasko).
Al kelesi kezdesýde Chalhanoglýdyń 57-mınýtta soqqan jalǵyz doby nemisterge jeńis áperdi.
Damır Qojamqul.
Derek, sýret: Football.ua.