Astanada elektrli samokat júrgizýshileri jiberetin quqyqbuzýshylyqtardy tirkeıtin ıntellektýaldy beınebaqylaý júıesi iske qosylady. Bul týraly elorda Polısııa departamenti habarlady, dep jazady Egemen.kz.
Joba aıasynda quqyq qorǵaý organdary men «Sergek» kompanııasynyń mamandary birlesip jumys júrgizip jatyr. Qazirgi tańda quqyqbuzýshylardy jaýapkershilikke tartýǵa múmkindik beretin memlekettik tirkeý nómirlerin avtomatty túrde taný júıesi ázirlenip jatyr. Atalǵan júıe aıyppul salýǵa arnalǵan materıaldardy avtomatty túrde esepteıdi.
Vedomstvo málimetinshe, sıfrlyq tehnologııalar men sáıkestendirý júıesin engizý quqyqbuzýshylyqtardy tıimdi anyqtaýǵa, jol-kólik oqıǵalarynyń sanyn azaıtýǵa jáne paıdalanýshylardyń tártibin arttyrýǵa múmkindik beredi.
Táýligine 690 dollar tabys: Elektrosamokat arqyly jasalǵan alaıaqtyq áshkere boldy
Búginde elordada 10 myńnan astam elektrli samokat bar, onyń shamamen 8 myńy belsendi qoldanysta. Soǵan sáıkes, bul kólik túrine qatysty quqyqbuzýshylyqtar men jol apattarynyń sany da artyp keledi. Jyl basynan beri 45 jol-kólik oqıǵasy tirkelip, 50 adam túrli jaraqat alǵan.
Almatyda samokat mingenderge baqylaý kúsheıdi
1 shildeden bastap zańnamaǵa engizilgen ózgerister kúshine enedi. Oǵan sáıkes, elektrli samokattar jol qozǵalysyna qatysýshy retinde resmı túrde tanylady. Atap aıtqanda:– júrgizýshiler qarańǵy ýaqytta shlem kıip, jaryq shaǵylystyrǵysh elementterdi paıdalanýǵa mindetteledi;– jolaýshy tasymaldaý, paıdalaný qaǵıdalaryn buzý jáne kámeletke tolmaǵandardyń samokat basqarýy úshin ákimshilik jaýapkershilik engiziledi;– velojoldarmen, velojolaqtarmen jáne joldyń oń jaq shetimen júrýge ruqsat beriledi;– 18 jasqa tolmaǵan tulǵalarǵa júrgizýshi kýáliginsiz joldyń júris bóligine shyǵýǵa tyıym salynady.