Úkimette Premer-mınıstrdiń orynbasary – Ulttyq ekonomıka mınıstri Serık Jumanǵarınniń tóraǵalyǵymen áleýmettik mańyzy bar azyq-túlik taýarlary baǵasynyń qazirgi jaǵdaıy qaraldy.
Inflıasııanyń baıaýlaý úrdisi alty aı qatarynan saqtalyp otyr. Byltyrǵy qyrkúıektegi 12,9%-dan bıylǵy naýryz aıynda 11,0%-ǵa deıin tómendedi. Retteletin qyzmetter salasynda bul nátıje tabıǵı monopolııa sýbektileriniń operasııalyq shyǵyndaryn ońtaılandyrý esebinen qamtamasyz etildi. Áleýmettik mańyzy bar azyq-túlik taýaryn (31 ataý) óndirýshilerge baǵany turaqtandyrý maqsatynda elektr energııasy men temirjol tasymaldary tarıfterin 70%-ǵa deıin tómendetý sharalary qarastyrylǵan.
Naýryz aıynda jyldyq azyq-túlik ınflıasııasy 11,7%-dy qurap, 1%-dyq tarmaqqa tómendedi. Sáýirdiń birinshi aptasynda áleýmettik mańyzy bar azyq-túlik taýarlary baǵasynyń ortasha ósim ındeksi nóldik deńgeıde saqtaldy (byltyrǵy sáıkes kezeńde – 1,6%). Qııar (-9,7%), pııaz (-2,3%), qyryqqabat (-1,7%) baǵasynyń tómendeý úrdisi jalǵasyp jatyr. Sonymen qatar balyq (-0,7%), qyzanaq (-0,6%), un men kúnbaǵys maıy (-0,2%) jáne ózge de azyq-túlik taýarlary arzandady.
Baǵany odan ári turaqtandyrý maqsatynda Saýda jáne ıntegrasııa mınıstrligi Mal sharýashylyǵy odaǵymen memorandýmǵa qol qoıý máselesin pysyqtap jatyr. Qujat jyl sońyna deıin et ónimderiniń belgili bir tobyna shekti baǵalardy belgileý esebinen ishki naryqty saýda jelileri arqyly qamtamasyz etýdi kózdeıdi.
Maýsymaralyq kezeńde ishki naryqty kókónis ónimderimen qamtamasyz etý maqsatynda Qazaqstan delegasııasynyń О́zbekstan Respýblıkasyna jumys sapary uıymdastyryldy. Delegasııa quramyna Saýda jáne ıntegrasııa mınıstrliginiń, oblys ákimdikteriniń, sondaı-aq iri saýda jelileriniń ókilderi kirdi.
Sapar barysynda áleýmettik mańyzy bar azyq-túlik taýarlary tizbesine kiretin jemis-kókónis ónimderin óndiretin ári eksporttaıtyn jetekshi ózbek kásiporyndarymen ekijaqty kelissózder júrgizildi. Onda elimizdiń ishki naryǵyna eksportty ulǵaıtý máselesine basa nazar aýdaryldy. Sonymen qatar delegasııa Sýrhandarııa oblysynyń birqatar aýdanyn aralap, ónimdi ósirý, jınaý, býyp-túıý, saqtaý jumysymen tanysty. О́nim sapasynyń joǵary ekeni aıtylyp, ony otandyq standarttarǵa sáıkestendirý maqsatynda qosymsha kalıbrleý qajettigi kórsetildi.
Kelissózder barysynda logıstıkany eskere otyryp, elimizdiń kóterme naryǵyndaǵy baǵadan tómen baǵamen jańa ónimnen 1,4 myń tonna sábiz, 400 tonna qyryqqabatty pılottyq jetkizý jóninde aldyn ala kelisimderge qol jetkizildi. О́nim sapasyn baqylaýdy ózbek tarapy júzege asyrady. Al jetkizý eldegi tasymaldaýshynyń qatysýymen «jasyl dáliz» tetigi arqyly uıymdastyrylady. Sonymen qatar taraptar ekijaqty taýar aınalymyn odan ári keńeıtý perspektıvalaryn, onyń ishinde ımportqa qajetti ta- ýarlar tizbesin qalyptastyrý máselelerin talqylady.
Aýyl sharýashylyǵy mınıstrliginiń málimetinshe, qazir óńirlik turaqtandyrý qorlarynda byltyrǵy kókónis ónimderiniń jalpy kólemi 29,5 myń tonnany quraıdy. Sonymen qatar jalpy kólemi 13,1 myń tonna erte pisetin kókónister boıynsha kelisimsharttar jasalyp jatyr. Onyń ishinde 10,8 myń tonnasy – Túrkistan oblysy fermerleriniń ónimi. Bul ishki suranysty otandyq óndiris esebinen qamtamasyz etýge jol ashady.