«Mazmundama» baspasynan qazaqtyń kásibı mýzyka óneriniń negizin salýshy Ahmet Jubanovtyń taǵylymǵa toly ómir joly baıandalǵan «Ahmet Jubanov kim?» atty kitap jaryq kórdi.
Kitap avtory – «Egemen Qazaqstan» gazetiniń Bilim jáne ǵylym bóliminiń tilshisi, belgili jas qalamger Bekzat Qulshar. Áriptesimizdiń «Ahmet Jubanov kim?» atty bul jınaǵynda belgili tulǵanyń balalyq shaǵynan bastap ónerdegi alǵashqy baspaldaqtary, ulttyq orkestrdi qurý tarıhy, el ishindegi talanttardy izdep tabý oqıǵalary syndy qalyń jurtshylyqqa beımálim derekter jeterlik.
Máselen, Ahmet Jubanov óziniń jeti jas úlken týǵan aǵasy, qazaqtyń til bilimi salasyndaǵy alǵashqy professory Qudaıbergen Jubanov ekeýi mektep tabaldyryǵyn birge attaǵany, ustazdary Qudaıbergendi «birinshi Jubanov», al Ahmetti «ekinshi Jubanov» dep ataıtyny, sol kezde synyptaǵy balalardyń eń kishkentaıy bolǵan, partadan boıy áreń kórinetin Ahmettiń qyzyqty oqıǵalary oqyrmandy ózine baýrap alady. Al kitapty oqyp otyrǵanda ulttyq orkestr qurý jolynda kúresip, alǵan betinen qaıtpaǵan tulǵanyń erligin eriksiz moıyndaısyz. Sondaı-aq aýylaýyldy aralap, kúıshilerdi izdep taýyp, el ishinde umytyla bastaǵan shyǵarmalardy notaǵa túsirip, qazaqtyń tuńǵysh ulttyq aspaptar orkestrin quryp, buryn jeke-jeke tartylatyn dombyra, qobyz, sybyzǵy, syrnaı sekildi aspaptardyń únin bir arnaǵa toǵystyrǵan mýzykanttyń ushan-teńiz eńbegine bas ıesiz.
Ahmet Jubanov 6 jastaǵy Nurǵısa Tilendıevtiń qabiletin baıqap, mýzyka synybyna oqýǵa túsirgeni, 70 jastan asqan kúıshi Dına Nurpeıisovany elimizdiń batys aımaǵynan Almatyǵa kóshirip alǵany, taǵy da basqa talanttardy el arasynan izdep taýyp, kásibı mýzykaǵa baýlyǵany syndy taǵylymdy derekter áli de indete zerttelýge tıis. Áriptesimiz sol taǵylymdy mıssııa jolyna osy bir shaǵyn kitabymen túskenin ańǵardyq.