BUU bas hatshysy Antonıý Gýterrısh halyqaralyq quqyqtyń álem boıynsha eleýli túrde álsirep bara jatqanyn málimdep, Taıaý Shyǵystaǵy jaǵdaıǵa alańdaýshylyq bildirdi, dep habarlaıdy Egemen.kz.
BUU shtab-páterinde ótken jýrnalısterge arnalǵan brıfıng barysynda bas hatshy soǵys júrgizý jáne kúsh qoldaný qaǵıdattarynyń barǵan saıyn eskerýsiz qalyp jatqanyn atap ótti. Onyń aıtýynsha, gýmanıtarlyq mindettemeler júıeli túrde buzylyp, jekelegen jaǵdaılarda BUU qyzmetkerleriniń qaýipsizdigine qatysty kepildikter saqtalmaı otyr. Sonyń saldarynan beıbit turǵyndar aýyr zardap shegip jatyr.
Saıasatker: Taıaý Shyǵystaǵy turaqsyzdyq Ortalyq Azııaǵa da áser etýi múmkin
Gýterrısh Taıaý Shyǵystaǵy ahýalǵa erekshe nazar aýdaryp, atalǵan qaqtyǵystyń áskerı jolmen sheshimi joq ekenin qadap aıtty. Ol taraptardy kelissózderdi qaıta jandandyrýǵa, atysty toqtatý rejımin qatań saqtaýǵa jáne Ormuz buǵazyndaǵy teńiz qatynasynyń erkindigin qamtamasyz etýge shaqyrdy.
«Qazirgi kezeń – eskalasııa ýaqyty emes, sabyrlylyq pen dıplomatııaǵa basymdyq beretin kezeń. Bul – Birikken Ulttar Uıymynyń beıbitshilik, ádilettilik, memlekettik egemendik jáne adam qadir-qasıetin qorǵaýǵa baǵyttalǵan ınstıtýttar men qaǵıdattardy berik qoldaıtynyn bildiretin aıqyn belgi», dep atap ótti BUU bas hatshysy.
Qasym-Jomart Toqaev Taıaý Shyǵystaǵy soǵysty tolyq toqtatý týraly kelisimdi quptaıdy
Antonıý Gýterrısh osy aptada Gaaga qalasyna baryp, Gaaga halyqaralyq sotynyń qurylǵanyna 80 jyl tolýyna arnalǵan is-sharalarǵa qatysatynyn málimdedi. Onyń aıtýynsha, bul sapar halyqaralyq quqyq normalaryn barlyq memleketterdiń múltiksiz saqtaý qajettigin aıqyndaıtyn mańyzdy saıası sıgnal bolmaq.
Nurbolat AMANBEK