Taıaýda Aqtaý qalasyndaǵy kólik qozǵalysy óte kóp sanalatyn joldardyń biri – «Aqtaý» oıyn-saýyq jáne ámbebap saýda ortalyǵy aldynda kútpegen oqıǵa boldy. Sol jerdi kesip ótip, solǵa burylǵan kóliktiń jolaýshylar jaq artqy esigi shalqasynan ashylyp ketti de, ishinen kishkene bala jerge dúrs etip qulady. Onyń joldyń qaq ortasyna qaraı domalaı jónelgeni kórsetilgen beınebaıan áp-sátte saıttardy «jaryp» jiberdi. Lezde kólikti toqtatqan júrgizýshi er adam men buǵan deıin balanyń janynda otyrǵan áıel júgirip túsip, jol ortasyna qaraı janushyra umtyldy da qyz balany kóterip kólikterine qaıta salyp alyp, zaýlaı jóneledi. Osydan soń-aq olardyń sońynda kele jatqan kóliktiń beınetirkeýishine jazylyp qalǵan oqıǵa týraly anyq-qanyǵyn bilip, tekserý júrgizýdi quqyq qorǵaý oryndary óz moıyndaryna alǵan bolatyn. Keshe jurtshylyqtyń jaǵasyn ustatyp qana qoımaı, kishkene qyz balanyń jaǵdaıy qalaı eken degen suraq mazalaǵan turǵyndar oqıǵanyń odan arǵy mán-jaıyna qanyqty. Mańǵystaý oblystyq ishki ister departamenti baspasóz qyzmetiniń habarlaýynsha, kólikti basqaryp otyrǵan ákesi men janyndaǵy anasy eki jasar qyzdy dereý aýrýhanaǵa jetkizgen. Dárigerler qyzdyń beti jyrylǵanmen, aıtarlyqtaı aýyr jaraqat almaǵandyǵyn, ıaǵnı deni sap-saý ekendigin aıtqan. Al «Jolaýshylar tasymaldaý erejelerin saqtamaý» baby boıynsha ákimshilik jaýapqa tartylǵan qyzdyń ákesine – kóliktiń júrgizýshisine aıyppul salynǵan. «Qyryq jyl qyrǵyn bolsa da, ajaldy óledi» degen osy eken. Áıtpese, ánsheıinde kólikter bir-birine ıin tirese syǵylysyp, únemi abyr-sabyr bolyp jatatyn jol ústi sol sátte kólikten bos jatty! Sońynda kele jatqan mashınalar da toqtap úlgergen nemese ony qyzyl baǵdarsham «tejeı» turǵan. Aqtaýlyq qyz bala bir ajaldan osylaı aman qaldy, biraq bul jolaýshylar, ásirese, bala tasymaldaý kezindegi júrgizýshilerdiń jaýapkershiligi men muqııattylyǵyn qatań saqtaýǵa sabaq bolsa jaqsy...
Mańǵystaý oblysy.