Polshanyń Krynısa-Zdrýı qalasynda shaıbaly hokkeıden jasóspirimder arasynda IA dıvızıonynyń álem chempıonaty ótip jatyr. Atalǵan týrnırde Qazaqstannyń jasóspirimder quramasy elıtaly dıvızıonǵa joldama alý úshin synǵa túsip jatyr, dep habarlaıdy Egemen.kz.
Jarysta Qazaqstan quramasymen qatar Polsha, Majarstan, Ýkraına, Shveısarııa jáne Slovenııa quramalary da baq synap jatyr. Álem chempıonatynda Qazaqstan quramasy ázirge úsh match ótkizip, barlyǵynda jeńiske jetti. Qazirgi tańda Qazaqstan quramasy 9 upaımen týrnır kestesinde kósh bastap keledi.
Alǵashqy týrda Qazaqstan quramasy Majarstandy 5:2 esebimen jeńse, ekinshi týrda Polsha quramasyn 10:2 esebimen tize búktirdi. Úshinshi týrda Ýkraına quramasyna qarsy kezdesýde otandyq hokkeıshiler kambek jasap, jeńiske jetti. Kezdesýdiń 25-mınýtyna deıin Qazaqstan quramasy 0:3 esebimen utylyp jatqan edi. Alaıda Maksım Hýdıakovtyń shákirtteri qarsylas qaqpasyna jaýapsyz bes shaıba soqty – 5:3.
Qazaqstan quramasy kelesi kezdesýin 23 sáýirde Shveısarııa quramasyna qarsy ótkizedi. Oıyn elorda ýaqytymen 15:30-da bastalady. Al toptyq kezeńdegi sońǵy match 24 sáýirde (saǵat 15:30-da) Slovenııa quramasyna qarsy ótedi.
Aıta keteıik, týrnır qorytyndysy boıynsha birinshi oryn alǵan komanda elıtaly dıvızıonǵa joldama alady.