Májilis depýtaty Baqytjan Bazarbek «Bolashaq» baǵdarlamasy boıynsha zańsyz grant alǵandar men bıýdjet qarjysyn negizsiz jumsaǵandardyń esimderin ashyq jarııalaýdy talap etti. Depýtattyń esebinshe, baǵdarlamadaǵy zańsyzdyqtardan kelgen shyǵyn 10 mıllıard teńgege jetýi múmkin, dep habarlaıdy Egemen.kz.
Depýtat baǵdarlama aıasyndaǵy birneshe óreskel zańsyzdyqty tizbektep berdi: 151 stıpendııa jospardan tys jáne lımıtten asyp taǵaıyndalǵan. Bul maqsatqa 2 mlrd 519 mln teńge jumsalǵan. Sondaı-aq 15 pretendent tipti Respýblıkalyq komıssııanyń sheshimi bolmasa da, shetelde bilim alyp jatyr.
Baqytjan Bazarbektiń aıtýynsha, 71 úmitker «bir-birine kepilger bolyp», memleketke 876 mln teńge shyǵyn keltirgen.
«Meniń esebimshe, shyǵyn kólemi 10 mıllıard teńgege jýyqtaıdy. Kimniń balalary men týystary shetelde «tegin» oqyp jatyr? Mınıstrlik olardyń tegin naqty ári ashyq jarııalaýy tıis», dedi Baqytjan Bazarbek.
Depýtat bul máseleni tekserý úshin Bas prokýratýra men quqyq qorǵaý organdarynyń qatysýymen arnaıy komıssııa qurýdy usyndy. Onyń maqsaty – Joǵary aýdıtorlyq palata anyqtaǵan 10 mıllıard teńgelik zańsyzdyqtarǵa qatysy bar laýazymdy tulǵalardy anyqtaý jáne jumsalǵan qarjyny memleketke qaıtarý.
85 mln teńge jelge ushty: Oqýdan shyǵarylǵandarǵa qaıta grant taǵaıyndalǵan
Eske sala keteıik, halyqaralyq «Bolashaq» stıpendııasyna qujattardy qabyldaý 16 naýryzda bastalyp, 16 qazanda aıaqtalady. Konkýrstyq irikteý 2026 jylǵy 13 sáýirden 31 jeltoqsanǵa deıin ótedi.