2026 jylǵy negizgi Ulttyq biryńǵaı testileýge ótinish qabyldaý naýqany máresine jetti. Testileý 10 mamyrda bastalyp, 10 shildege deıin jalǵasady, al talapkerlerge ony eki ret tapsyryp, eń joǵary nátıjemen grant konkýrsyna qatysý múmkindigi berilgen, dep jazady Egemen.kz.
Ǵylym jáne joǵary bilim mınıstrligi málimetinshe, bıyl testileýge qatysý úshin 240 myńǵa jýyq talapker 446 myńnan astam ótinish bergen. Bul ótken jylmen salystyrǵanda aıtarlyqtaı joǵary (2025 jyly – shamamen 216 myń talapker jáne 399 myń ótinish). Testileýdi tapsyrý tilin tańdaýda talapkerlerdiń 73%-y qazaq tilin, 27%-ǵa jýyǵy orys tilin tańdasa, 521 adam aǵylshyn tilinde tapsyrýǵa nıet bildirgen.
Pándik kombınasııalar arasynda eń kóp tańdalǵany – «Matematıka–Fızıka» (17,9%), odan keıin «Bıologııa–Hımııa» (14,5%) jáne «Shyǵarmashylyq emtıhan» (12,4%) baǵyttary. О́tinishter Ulttyq testileý ortalyǵy ázirlegen app.testcenter.kz saıty men UTO.kz qosymshasy arqyly qabyldandy. Talapkerler test tapsyrý kúnin, ornyn, ýaqytyn ózderi tańdady.
Bilim deńgeıin arttyrý maqsatynda qańtar jáne naýryz aılaryndaǵy UBT nátıjeleri boıynsha ár pánnen jeke taqyryptyq taldaý usynylyp, talapkerlerge álsiz tustaryn anyqtap, daıyndyqty jetildirýge múmkindik berildi. Sonymen qatar birinshi múmkindikten keıin ekinshi testileýge deıin daıyndyqty jaqsartýǵa ýaqyt qarastyrylǵan.
Ulttyq testileý ortalyǵynyń saıtynda baıqaý synaqtary iske qosylyp, test tapsyrmalaryna negiz bolǵan ádebıetter tizimi, test jospary, «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data, «Informatıka» páninen termınder, sondaı-aq ádebı shyǵarmalar tizimi jarııalandy.
UBT-ǵa qosymsha tańdaý: AIT testiniń ereksheligi nede?
2026 jyly UBT formaty ózgerissiz qalady. Talapkerler 3 mindetti jáne 2 beıindik pán tapsyrady, tapsyrmalar sany – 120. Onyń ishinde «Qazaqstan tarıhynan» – 20, «Oqý saýattylyǵy» men «Matematıkalyq saýattylyqtan» – 10 tapsyrmadan, al ár beıindik pánnen – 40 tapsyrma beriledi. Eń joǵary ball – 140.
Testileý ýaqyty 4 saǵat (240 mınýt). Erekshe bilim berý qajettilikteri bar talapkerler úshin qosymsha 40 mınýt ýaqyt saqtalady. Emtıhan kezinde testileý júıesinde kalkýlıator, hımııalyq elementterdiń perıodtyq júıesi jáne tuzdardyń erigishtik kestesi qoljetimdi bolady, sondaı-aq olardyń qaǵaz nusqalary usynylady.
Testileý aıaqtalǵan soń talapkerler 30 mınýt ishinde apellıasııaǵa ótinish bere alady. Apellıasııalyq komıssııa sheshiminen keıin sertıfıkat jeke kabınette jarııalanady. Sonymen qatar ótinishti komıssııa otyrysy bastalǵanǵa deıin keri qaıtaryp alý múmkindigi bar.
Mınıstr UBT-ǵa qatysty jańasha ózgeristerdiń qandaı bolatynyn jarııalady
Mınımaldy shekti baldar ózgerissiz qaldy: ulttyq JOO-lar úshin – 65 ball, basqa joǵary oqý oryndaryna – 50 ball, «Pedagogıkalyq ǵylymdar» baǵytyna – 75 ball, «Densaýlyq saqtaý» – 70 ball, «Quqyq» – 75 ball. Bul rette ár pán boıynsha belgilengen eń tómengi ball talaptaryn saqtaý mindetti.
Qaýipsizdik sharalary da kúsheıtilgen. Testileý pýnktterinde metall izdegishter arqyly tyıym salynǵan zattardy kirgizbeý baqylaýy júrgiziledi, aýdıtorııalarda baılanys sıgnaldaryn basatyn qurylǵylar ornatylyp, beınebaqylaý qamtamasyz etiledi.
2026 jylǵy UBT aıaqtalǵannan keıin 31 qazanǵa deıin beınejazbalarǵa taldaý júrgiziledi. Erejelerdi buzý derekteri anyqtalǵan jaǵdaıda talapkerdiń nátıjeleri, tipti grant ıegeri atanǵan bolsa da, joıylady.
UBT nátıjesi jetkiliksiz: Bolashaq muǵalimder úshin qosymsha emtıhan engiziledi