Qarjylyq monıtorıng agenttiginiń Astana qalasy boıynsha departamenti asa iri kólemdegi alaıaqtyq faktisi boıynsha birneshe qurylys kompanııasynyń basshysy Móldir Súıinshálige qatysty tergep-tekserý júrgizip jatyr, dep habarlaıdy Egemen.kz.
Tergeý málimetterine sáıkes, 2021-2024 jyldar aralyǵynda kúdikti «Nura Elite» kottedj qalashyǵyn salý syltaýymen azamattardan qarajat tartqan. Joba aıasynda 37 kottedj jáne 24 taýnhaýs salý josparlanǵanymen, búgingi kúni nysandar tolyq aıaqtalmaǵan.
Satyp alýshylarmen aldyn ala satyp alý-satý sharttary jasalyp, nátıjesinde 56 adam jábirlenýshi retinde tanyldy. Tartylǵan qarajattyń jalpy somasy 3,9 mlrd teńgeni quraıdy. Tergeý barysynda onyń 322 mln teńgesi kúdiktiniń, sondaı-aq onyń jaqyn týystarynyń esepshottaryna aýdarylǵany, al 145 mln teńgesi qolma-qol aqshaǵa aınaldyrylǵany anyqtalǵan.
«Máselen, jábirlenýshi tolyq tólegen kottedjdiń biri kúdikti tarapynan jeke mindettemeleri boıynsha kepilge qoıylyp, keıin úshinshi tulǵalardyń atyna rásimdelip, birneshe ret qaıta satylǵan. Súıinsháli Móldir satyp alýshylarmen is júzinde jer ýchaskelerine quqyq berýdi kózdeıtin sharttar jasasqan, alaıda olardy ıelikten shyǵarýǵa zańdy quqyǵy bolmaǵan. Úleskerlerdiń qarajatynyń bir bóligi Astana qalasynda «Asylhan» turǵyn úı keshenin salýǵa arnalǵan jertelimin satyp alýǵa jumsalǵan», delingen Qarjylyq monıtorıng agenttiginiń habarlamasynda.
Perızat Qaırattyń Mercedes-Benz kóligi Astana polısııasyna berildi
Budan bólek, qurylysqa qajetti ruqsat qujattary bolmaǵanyna qaramastan, kúdikti Perızat Qaırattyń «Biz birgemiz» qaıyrymdylyq qory arqyly muqtaj azamatqa páter beriletini týraly aqparat jarııalanǵan. Alaıda is júzinde turǵyn úı kesheniniń qurylysy bastalmaǵan.