AQSh-ta prezıdentke qastandyq jasamaq boldy degen kúdikpen ustalǵan azamatqa ómir boıyna bas bostandyǵynan aıyrylý qaýpi tónip tur, dep jazady Egemen.kz.
Aq úı tilshileriniń dástúrli keshki qabyldaýynda atys uıymdastyrdy dep aıyptalǵan 31 jastaǵy Koýl Allenge úsh birdeı aıyp taǵyldy. Tergeý deregine sáıkes, ol AQSh prezıdentine qastandyq jasaýǵa árekettený, zorlyq sıpattaǵy qylmys kezinde atys qarýyn qoldaný jáne qarýdy shtattar arasynda zańsyz tasymaldaý baptary boıynsha kúdikke ilingen. Aıyptalýshy óz kinásin moıyndamady.
AQSh prokýrory Janın Pırro bul oqıǵany «prezıdentke qarsy jasalǵan qastandyq áreketi» dep baǵalap, kúdiktiniń nıeti aıqyn bolǵanyn málimdedi. Sot sheshimimen Allen qamaýda qaldyryldy, aldyn ala tyńdaý 11 mamyrǵa belgilendi. Eger ol qastandyq jasaý áreketi boıynsha kináli dep tanylsa, ómir boıyna bas bostandyǵynan aıyrylýy múmkin, al ózge eki aıyp boıynsha 10 jylǵa deıin federaldyq túrme jazasy qarastyrylǵan.
Oqıǵa 25 sáýir kúni Washington Hilton qonaqúıinde ótken baspasóz keshi kezinde bolǵan. Qarýlanǵan kúdikti banket zalynyń kireberisinde oq jaýdyryp, qaýipsizdik shebin buzyp ótken. Onyń qolynda myltyq, tapansha jáne pyshaqtar bolǵan. Atys saldarynan Qupııa qyzmettiń bir agenti jaralandy, alaıda ony oq ótkizbeıtin keýdeshe aman alyp qaldy. Kúdikti polısııa tarapynan oqıǵa ornynda ustaldy.
Tramp qatysqan keshte oq jaýdyrǵan kúdikti sot aldynda jaýap beredi
Sol sátte zaldaǵy shamamen 2300 adam ústel astyna tyǵylyp, qaýipsizdik qyzmeti AQSh prezıdenti Donald Tramp pen vıse-prezıdent Djeı Dı Vensti shuǵyl túrde evakýasııalady. Bir saǵattan keıin Tramp quqyq qorǵaý organdary qatysýshylardy ǵımarattan shyǵarý jóninde sheshim qabyldaǵanyn aıtyp, bul áreket qaýipsizdik hattamasyna saı júrgizilgenin jetkizdi. Sondaı-aq ol is-sharanyń 30 kúnge shegerilgenin málimdedi.