Oral qalasynda jasalǵan eń iri keme Otan qorǵaýshylar kúnine oraı sýǵa túsirilip, el shebin qorǵaý úshin Kaspııdi betke aldy. Keme Prezıdent tapsyrmasymen Qorǵanys mınıstrliginiń tapsyrysy aıasynda jasalyp shyqqan.
Kemeni sýǵa túsirý saltanatyna oraı ótken rásimge Batys Qazaqstan oblysynyń ákimi Narıman Tóreǵalıev qatysyp, Prezıdent tapsyrmasymen júzege asqan mańyzdy jobanyń sátti aıaqtalýymen quttyqtady.
– Búgin «Zenıt» zaýyty ujymynyń kásibı sheberligi men qajyrly eńbeginiń arqasynda elimizdegi eń iri kemeni sýǵa túsirip otyrmyz. Korablge memleket jáne qoǵam qaıratkeri Dinmuhamed Qonaevtyń esimi berildi. Ekıpaj qorǵanys áleýetin kúsheıtýde qaltqysyz qyzmet etedi dep senemin, sáttilik tileımin! – dedi N.Tóreǵalıev.
«Zenıt» zaýyty jasap shyǵarǵan 37-sý kóliginiń salmaǵy – 720 tonna. Júk tasymaldaýǵa arnalǵan trıýmniń kólemi – 30 tekshe metr. «Oral «Zenıt» zaýyty» AQ bas dırektory Vıtalıı Kaplýnovtyń aıtýynsha, kemeniń jyldamdyǵy 16 túıinge deıin jetedi. Uzyndyǵy 51 metr, eni 9,5 metrlik áskerı korabl 8 baldyq daýylǵa shydas beredi. Jobany júzege asyrýǵa zaýyt jumysshylary túgel atsalysqan.
Kópfýnksıonaldy bul keme elimizdiń áskerı teńiz kúshteriniń kemeleri men katerlerin dızeldik otyn, aýyzsý, azyq-túlik jáne ózge de materıaldyq-tehnıkalyq jaǵynan qamtamasyz etýge baǵyttalǵan. Jeke quram 30 shaqty adamnan turady. Ekıpajǵa qolaıly jaǵdaı jasalǵan.
«Kemeni Oral qalasynan Jaıyq ózeni arqyly teńizge jetkizgenge deıin birneshe kópirdiń astynan ótkizýge týra keledi. Sondyqtan onyń dińgegi Aqtaý aılaǵynda ornatylady», deıdi kemeni jasaýshylar.
Bul keme oraldyq «Zenıt» zaýytynyń konveıerinen shyqqan 37-sý kóligi ekenin aıttyq. Teńizshiler buǵan deıingi korablderge de «Oral», «Saryarqa», «Túrkistan», «Mańǵystaý», «Semeı» syndy qala men jer ataýlaryn qoıǵan edi. Bul jolǵy eń úlken áskerı keme memleket jáne qoǵam qaıratkeri – Dinmuhamed Ahmetuly Qonaevtyń esimin ıelenip otyr.
Batys Qazaqstan oblysy