Almatyda qazaqtyń dańqty balýany Qajymuqan Muńaıtpasovtyń 155 jyldyǵyna oraı grek-rım men erkin kúresten «Ardagerler alańy» dep atalatyn halyqaralyq týrnıri ótti. Bul jarysta Qazaqstannan bólek, AQSh, Reseı, Mońǵolııa, Moldova, Grýzııa, Qyrǵyzstan, Belarýs jáne О́zbekstannan kelgen 500-ge tarta balýandar beldesti, dep habarlaıdy Egemen.kz.
Balýan Sholaq atyndaǵy Mádenıet jáne sport saraıynda alty kilem tóseldi. Shyny kerek, buryn-sońdy ardagerler arasynda osyndaı aýqymdy shara uıymdastyrylǵanyn kórgen emespiz. Tipten, ondaı týrnırler eresekter arasynda sırek ótedi. Bıyl ádettegideı 35 pen 70 jastaǵy alty ardagerlik dıvızıonyndaǵy básekelerden bólek, 18 ben 34 jas aralyǵyndaǵy sportshylar da bozkilemde baq synady. Qatysýshylardyń qatarynda kezinde halyqaralyq arenada atoı salǵan sańlaqtarmen qatar áýesqoı sportshylar da boldy. Bir qýantarlyǵy, jastary 60-tan asyp, 70-ke taıap qalǵan aqsaqaldardyń arasynda áli de sportty serik etip, salaýatty ómir saltyn ustanyp júrgender az emes eken. Bala-shaǵa bylaı tursyn, tipten jarysqa nemeresimen kelgen qarııalardy da kózimiz shaldy.
– Alǵash ret «Ardager Alańyn» ótkizgen kezde keleshekte ol osyndaı aýqymdy sharaǵa aınalady dep esh oılaǵan joq edik, – dep bastady óz áńgimesin jarysty uıymdastyrýshy ári joba jetekshisi Erlan Malaev. – Osydan birer jyl buryn Almatydaǵy sport mektepteriniń birinde tusaýy kesilgen týrnırde jergilikti balýandardan bólek, О́zbekstan men Qyrǵyzstannyń ǵana ókilderi óner kórsetti. Keıinnen qatarymyz kóbeıdi. Atalǵan jarys sportshylardyń da, kórermenderdiń de kóńilinen shyqty. Sol kezde-aq bul bastamany odan ári jalǵastyrý jaıynda keńinen áńgime qozǵady. Kópshilik bul ıdeıany qoldady. Sodan biz de iske bel sheshe kiristik. Ekinshi jáne úshinshi jarys «Sádý-Arenada» uıymdastyryldy. Bıyl Almaty qalalyq Sport jáne dene shynyqtyrý basqarmasy qoldaýymen Balýan Sholaq atyndaǵy sport saraıyn eki kúnge «menshigimizge» aldyq. Sol úshin de qamqorlyq kórsetken azamattarǵa zor alǵysymdy bildirgimdi keledi. О́zderińiz baıqap otyrǵandaı, týrnırdiń geografııasy keńeıdi, qatysýshylardyń sany artty jáne de onyń deńgeıi ósti. Buıyrtsa, keleshekte biz osy jobany odan ári jetildirip, budan da joǵary dárejege kóteremiz.
E. Malaev myrza bastaǵan belsendi top aldaǵy ýaqytta atalǵan týrnır elimizdiń biryńǵaı sporttyq kúntizbesine enip, qatysýshylarǵa túrli ataqtar men razrıadtar beriledi dep úmittenip otyrǵanyndaryn da jasyrmady. Ol úshin Týrızm jáne sport mınıstrliginiń qoldaýy qajet. Joba jetekshisiniń aıtýynsha, bul jaǵdaı ardagerler sportynyń damýyna úlken septigin tıgizip, sony serpin beretini sózsiz.
«Ardagerler alańyna» qatysýshylar arasynan kezinde Qazaqstannyń ulttyq quramasy sapynda bolyp, halyqaralyq arenada el namysyn abyroıly qorǵaǵan Erbol Qońyratov, Aıbek Eńsehanov, Andreı Samohın, Dáýren Baıahmetov, Qaısar Boranbaev, Ańsaǵan Qusaıynov jáne taǵy basqa tanymal balýandardy kózimiz shaldy. Olardyń deni óz salmaq dárejelerinde top jardy. Sonymen qatar, ardagerler dodasynda atoı salyp, álem jáne Azııa chempıonatynda bir emes, birneshe márte bas júldeni oljalaǵan oǵlandar da óz ónerlerin ortaǵa saldy.
Qazaqstannyń eki dzıýdoshysy Grand Slam týrnıriniń jartylaı fınalyna shyqty
Balýan Sholaq atyndaǵy sport saraıynda biz beıbit zamannyń batyrlaryn da jolyqtyrdyq. Solardyń biri – Erjan Ámirhanov. Bul azamattyń grek-rım kúresinen sport sheberi degen ataǵy bar. Qazirgi kezde Semeıde jastardy jattyqtyrady. 2017 jyldyń jazynda Erjan kólik satyp alý úshin Novosibirge sapar shegedi. Avtobýs túngi saǵat 3:20-da Aleısk qalasyna taıady. Ol kezde barlyq adam uıqy qushaǵynda jatty. Barlyǵy – 42 jolaýshy. Onyń 12-si balalar. Kenet qoǵamdyq kólikten órt shyǵyp, jalyn jan-jaqty sharpı bastaıdy. Muny jalǵyz Ámirhanov baıqaıdy. Keıipkerimiz jaǵdaıdy júrgizýshige aıtyp, dereý kólikti toqtatady. «О́rtenip jatyrmyz, tezdetip avtobýstan shyǵyńyzdar» dep aıqaılady. Biraq jolaýshylar oryndarynan qozǵalmady. Sóıtse biraz adam kók tútinge ýlanyp ta úlgergen eken. Al keıbireýleri ne bolǵanyn túsinbeı, meń-zeń bolyp tur. Endi esh kidirýge bolmaıdy. Erjan eki esikti teýip ashyp, barlyq jolaýshylardy kezek-kezegimen syrtqa shyǵara bastaıdy. Sońǵy adam shyqqansha sportshy órttiń ortasynda boldy. Bas-aıaǵy 1 mınýt 45 sekýndta ol barlyq jolaýshyny qutqardy. Osy oqıǵadan qulaǵdar bolǵan bette jýrnalıster Erjannyń erligi jaıynda jarysa jazady. Arnaıy sıýjetter túsirildi. Sóıtip, Semeı qalasynyń shetqara jaǵynda balǵyn balýandary baptap júrgen qarapaıym ǵana azamattyń ataǵy alysqa jaıylady. Mine, sol erjúrek Erjan da «Ardagerler alańynda» kúsh synasýdy qup kórgen eken...
Qazaqstan Barysy Grand Slam týrnırin Qazaqstan quramasy 8 júldemen aıaqtady
Atalǵan týrnır aıasynda Balýan Sholaq atyndaǵy Mádenıet jáne sport saraıynda Qajymuqan Muńaıtpasovtyń ómiri men jetistikterine arnalǵan kórme uıymdastyrylady. Onda «Kúsh atasynyń» iri halyqaralyq jarystarda jeńip alǵan ordenderi men medaldary, belbeýleri, tutynǵan zattary jáne basqa da qundy jádigerleri kópshilik nazaryna usynyldy. Eksponattardyń bir bóligi Túrkistan oblysyndaǵy balýannyń týǵan jerinen arnaıy ákelingenin de aıta ketken abzal.