Uly jazýshy Muhtar Áýezov Otanymyz jóninde: «Otan degen uǵym bizder úshin aıqyn aqıqat. Otan – óziń týǵan qala, óziń ósken aýyl, óziń oqyǵan mektep, qysqasy – ózińdi ómir azamaty bolyp qalyptastyrýǵa áser etken orta. Endeshe, solar jaıly bilý aýadaı qajet nárse», – dep aıtqan eken.
Kóziqaraqty jan bir sát zer sala qaraıtyn bolsa, uly sýretkerdiń osy aıtqandarynda úlken mán-maǵyna jatqanyna kóz jetkizetini anyq. О́ıtkeni, el tarıhyn biletin, dúnıe-tanymy keń, týǵan ólkesiniń mádenı-tarıhı qundylyǵyn erekshe qurmetteıtin azamattar qalyptastyrý keshegi kúnniń de, búgingi kúnniń de basty talaby boldy, bola da bermek. Ekinshiden, egemendigimizdi alǵanǵa deıin qazaq halqynyń tarıhy tumshalanyp ári burmalanyp keldi. Endi tarıhymyzdyń aqıqatyn arshyp, ony keleshek urpaqqa jetkizý asa mańyzdy máseleniń biri bolyp otyr.
Ár adam óziniń týyp-ósken jeriniń, turyp jatqan óńir-aımaǵynyń tarıhyn bilgeni jón, ol eshqashan artyq bolmaıdy. Bul máselede bilim mekemeleriniń, onyń ishinde mekteptiń orny bólek. Osyǵan baılanysty Úlkendıqan orta mektebiniń basshylyǵy mektepte «О́lketaný» kýrsyn ashqan edi. Ondaǵy maqsat – oqýshylardy ólke tarıhyna qatysty derekter jınaýǵa tartý, zertteý jumystaryn júrgizý jáne osyndaı is-sharalar arqyly olardyń týǵan jerge degen súıispenshiligin arttyryp, boılaryna patrıottyq sezim rýhyn sińirý bolatyn.
Búginde mektebimizde «О́lketaný» kýrsynyń jumysy júıeli túrde jolǵa qoıylǵan. Oǵan oqýshylarmen qatar, muǵalimder de qatysady. Jınaqtalǵan qujattar men túrli derekter de az emes. Olardy oqýshylar retine qaraı tarıh páni sabaqtarynda paıdalanyp ta júr. Biz jaqynda «О́lketaný» kýrsynyń bir taqyryby retinde Uly Otan soǵysyna qatysyp, erlik kórsetken jáne tylda eńbek etken atalarymyz ben ájelerimizdiń eńbek joly, ómir joly jóninde málimetter jınaýdy qolǵa aldyq. Aýylymyzdan 120-dan astam azamat surapyl soǵysqa attanǵan eken. Solardyń basym kópshiligi týǵan jerine oralmaǵan. Bul is-shara Uly Jeńistiń 70 jyldyǵyna arnalyp otyr.
Osy taqyryp boıynsha «О́lketaný» kýrsynyń bir sabaǵy maıdanda erliktiń eren úlgisin kórsetken soǵys ardagerleri Zamanbek Battalhanov, Mórdin Taıypov jáne Áýbákir Sabırovke arnaldy. Sabaq barysynda olardyń maıdan dalasyndaǵy erlikterinen málimetter men derekter keltirildi. Jaýyngerlik nagradalarynyń berilý tarıhy qujattar negizinde baıandaldy. Aldaǵy ýaqytta osyndaı taǵy bir sabaqty tylda jumys istep, Jeńisti jaqyndatýǵa úles qosqan analarymyz ben ájelerimizge arnaýdy josparlap otyrmyz.
Jalpy, tarıh pánin oqytýda týǵan ólke jónindegi tarıhı derekterdi tıimdi paıdalanýdyń oqýshyǵa bereri mol. О́ıtkeni, oqýshylar ár taqyrypqa baılanysty materıaldardy paıdalana otyryp, oılaý arqyly, zerdeleý arqyly shyǵarmashylyqpen jumys isteýge daǵdylanady.
Eleýsiz QULANBAEV,
Úlkendıqan orta mektebi tarıh pániniń muǵalimi.
Almaty oblysy,
Uıǵyr aýdany.