Ultaralyq tatýlyq – álemdi beıbitshilik besiginde terbep turýshy birden-bir mańyzdy faktor. «Ala qoıdy bóle qyryqqan júnge jarymaıdy» demekshi, bárin teń kórý kerek, ol úshin árbir eldegi ózge ult ókilderiniń Otanǵa degen súıispenshiligi basym bolýy tıis.
Bizdiń aýdanymyzda da el qatarly ómir súrip, urpaqtaryn órbitip, ortasyna syıly da qadirli bolyp júrgen ózge ult ókilderi jeterlik. Solardyń ishinde halyqtyń jyly yqylasyna bólenip, qazirgi kúnde zeınet jasyna kelgen tatar qyzy Bıbınur Temirbolatova, polıak qyzy Raısa Sovetskaıa jáne qazaq qyzy Roza Jetpisqyzynyń jóni bir basqa. Sebebi, bulardyń ekeýi ózge ult ókilderi bola tura, qazaqtyń Amanǵalıevter otbasyna kelin bolyp túskenderi.
Bıbınur Husaıynqyzy Jalpaqtal aýylynda dúnıege keledi. Jalpaqtal orta mektebinde bilim alady. Ápkesi Maıra Taldyqudyq aýylyna medbıke bolyp aýysýyna baılanysty Bıbınur apamyz otbasymen qonys aýdarady. Bıbınur ájeı Oral qalasynda 10 aılyq tigin ýchılıshesin bitirip, elge kelip tiginshilikpen shuǵyldanady. Sonymen qatar, qurylys salasynda maılaýshy, sylaqshy qyzmetterin de atqarǵan. 1962 jyly qazaq ultynyń jigiti Ermek Amanǵalıevpen otbasyn quryp, segiz balany dúnıege ákeledi.
Al polıak qyzy Raısa Petrovna bolsa, 1949 jyly Ýkraınanyń Vınnısa oblysyndaǵy, Týrbovskıı aýdanyna qarasty Kýrovka selosynda dúnıege keledi. Keńes ókimetiniń Qazaqstanda tyń jáne tyńaıǵan jerlerdi ıgerý kezinde Raısa ájeniń otbasy da Qazaqstanǵa qonys aýdaryp, Taldyqudyq aýylyna kóship keledi. Osy jerde bilim alady. Mektepti támamdaǵan soń aýylda túrli salada eńbek etedi. 1967 jyly mehanızator Mustafa Amanǵalıevke turmysqa shyǵyp, 9 balany dúnıege ákeledi. Mustafa aǵamyz ómirden erte ótedi de, órimdeı balalaryn ózi tárbıelep er jetkizedi.
Sonymen qatar, Muzafar Amanǵalıev aǵanyń zaıyby Roza Jetpisova apaıymyz Jańaqala aýdanynda dúnıege kelgen. Esepshi bolyp qyzmet etedi. Muzafar aǵa ekeýi 4 bala tárbıelep ósirgen.
Jergilikti jurtpen bite qaınasyp ketken olardyń júzderi basqa bolǵanymen, júregi bir. Al elimizdegi birlik, tatýlyq, kelisimniń baıandy bolýyn tileıtin analardyń tili de bir bolyp ketkendeı. Olar qazaq tilin – ult pen ulysty biriktirýshi, uıystyrýshy, túsindirýshi, bir-birimen uǵystyrýshy quralǵa aınalǵan memlekettiń eń basty tetigi dep sanaıdy.
Bıbınur apamyzben tildeskende: «Qazaqta birlik bolmaı, tirlik bolmaıdy» degen ulaǵatty uǵym bar. Maǵan elimizde beıbit ómir súrip jatqan ulttar men ulystardyń tatýlyǵy artyp, Qazaqstanymyzdyń nyǵaıyp, órkendeýinen asqan baqyt joq. Biz kindik qanymyz tamǵan jerde turamyz jáne osynda ómir súrip, ósip-ónemiz, ádet-ǵurpymyzdy, mádenıetimizdi jáne tilimizdi ustanamyz. Qazaq jerin meken etken ulttardyń bárine osyndaı múmkindik berilgen. Osy úshin qazaq halqyna, Elbasymyzǵa myń alǵys aıtamyz», – dep aǵynan jaryldy.
Sonymen qatar, Raısa Petrovna da bylaı deıdi aǵynan jaryla: «Maqsatymyz – ortaq, muratymyz – bir, sondyqtan keleshegimizdiń kemeldenýine kepil bolatyn tatýlyq pen dostyqtyń dińgegin bıiktetý barshamyzdyń paryzymyz. О́ıtkeni, biz rasynda kópultty memlekette, onyń ishinde óz shańyraǵymyzda birneshe ulttyń adamdarymen birge turamyz. Osy sebepti, eldiń aýyzbirshiligi men tatýlyǵyn barlyǵynan joǵary qoıamyz. Qazaq halqymen quda bolǵanymyzǵa da birneshe jyl boldy. Olar qudasyn qudaıyndaı qurmetteıdi. Bul óńirde jergilikti ult qazaq bolǵandyqtan, úıde qazaqsha sóılep, ulttyq dástúrdi ustanamyz. Toı-jıyndarǵa, mádenı sharalar men konsertterge birge baramyz. Apta saıyn dastarqan basynda kezdesip, áńgime-dúken quramyz».
Taldyqudyq aýylynda bir shańyraq astynda bas qosqan túrli ult ókilderi osylaısha baqytty ómir súrýde. Olarmen dıdarlasyp, áńgimelesý barysynda árqaısysynyń júregi qazaq, elim, jerim dep soǵatynyn baıqadyq. Bul – bizdiń Táýelsizdikpen birge jetken syıymyz. Endigi ýaqytta bul qundylyqtardy urpaqtan-urpaqqa jalǵaý – barshamyzdyń ortaq mindetimiz.
Gaýhar ÁDILJANQYZY.
Batys Qazaqstan oblysy,
Qaztalov aýdany.