TО́RAǴALYQTYŃ EKINShI JARTYSY

EQYU-ǵa múshe memleketter syrtqy ister mınıstrleriniń beıresmı kezdesýimen bastalmaq Búgin Almatyda Eýropadaǵy qaýipsizdik jáne yntymaqtastyq uıymyna múshe memleketterdiń syrtqy ister mınıstrleri bas qosady. Sammıt deseńiz de, kezdesý deseńiz de beıresmı deıtin anyqtaýyshy bar. Alaıda beıresmıligine qaramastan, osy kezdesý kóp máselelerdi anyqtaıtyny jáne bar. Buryndary EQYU-ǵa kim tór­aǵalyq etip jatqanyn bile ber­meı­tinbiz, tipti bázbir eldiń syrt­qy ister mınıstrin EQYU-nyń is basyndaǵy tóraǵasy retinde Elbasy qabyldap jatqanyn es­tigende tań qalatynbyz. Uıymǵa tóraǵalyq etý Qazaqstannyń enshisine tıgende neniń ne ekenin jaqsy túsinetin boldyq. Burynǵy Uıym jetekshilerin Qazaqstanǵa kelgeninde ǵana tanyp jatatyn bolsaq, búginde tóraǵa eldiń Prezıdenti, álemniń kez kelgen elinde Qazaqstan degen ataýdyń balamasy retinde aıtylatyn Nur­sultan Nazarbaevty ǵana emes, Qazaqstan Respýblı­ka­sy­nyń Memlekettik hatshysy – Syrt­qy ister mınıstri Qanat Saý­­dabaevty EQYU-ǵa múshe qaı memlekettiń de júgirgen balasy­nan eńkeıgen qarııasyna deıin jyǵa tanıtynyna kózimiz jetken­deı. Elbasy Nursultan Nazar­baev­tyń tikeleı usynysymen jáne basshylyǵymen EQYU tóraǵasy retinde Qazaqstan júrgizip jat­qan sharalar álem elderi tara­pynan qoldaý taýyp otyrǵany belgili. Sonyń ishinde memleket­ter arasyndaǵy daýly másele­ler­di sheshýge qos tarapty da ılik­tirý, Qyrǵyzstandaǵy tóńkeristen keıingi jaǵdaıdy sabasyna túsirý, Aýǵanstandaǵy ahýaldy turaq­tan­dyrý úshin qam jasaý, osydan 20 jyldaı buryn óziniń tikeleı ónege kórsetýimen ıadrolyq qaýip­sizdikti barynsha azaıtý jóninde naqty nátıjelerge qol jetkizý, basqa da halyqaralyq uıymdarǵa óz tóraǵalyǵyn paıdalanyp, Eýro­pa men Azııanyń, Eýropa men musylman áleminiń arasyn ja­qyn­datý Qazaqstannyń tóraǵa retindegi bastamashyldyǵymen júzege asyp jatqanyn maqta­nysh­pen aıtýǵa bolady. Sol qa­tar­dan oryn alatyn bir shara búgin Almatyda bastalyp, erteń qala mańyndaǵy “Aqbulaqta” jalǵasatyn bolyp otyr. Baǵdarlamanyń júzege asýy barysynda ózgerister bolýy da múmkin, alaıda qazirgi bolmy­sy­nyń ózi oqıǵalarynyń kóptigimen tańdandyrady. Sharanyń birinshi kúninde Is basyndaǵy tóraǵanyń jıyrma shaqty kezdesýi kózdel­gen eken. Ekinshi kúninde konfe­rensııanyń ashylýyn, onyń eki sessııasy kezinde taǵy da son­shalyqty kezdesýlerdiń ótetinin eskersek, olardyń bári birlese kelip, úlken Sammıt týraly naqty máseleniń sheshilýine múmkindik berse, atymyzdyń báıgeden kelgeni deı bereıik.